Pag-aatubang kan Maogmang Bareta—Dara an mga Brochure
1 Kanigoan kaogma na ihiras sa mga tawo an maogmang bareta kan Kahadean! (Gibo 15:3) Alagad limitado an satong panahon sa paggibo kaini. May kadonongan, si Jehova paagi sa saiyang organisasyon nagtatao nin ekselenteng mga pantabang sa pag-adal nin Biblia na puwede niatong iwalat sa interesadong mga tawo tanganing matabangan sinda sa espirituwal.
2 Sa Hulyo asin Agosto gagamiton niato an bagong Topikong Mapag-oolayan, “Kun Ano an Gigibohon kan Kahadean,” asin mag-aalok kita kan arin man na brochure na sinasambit sa artikulong ini. Kaipuhan niatong maaraman kun paano epektibong iintrodusir an mga brochure na ini kaoyon kan satong Topikong Mapag-oolayan manongod sa Kahadean nin Dios.
AN NAGKAPIRANG SUHESTION
3 Enjoy Life on Earth Forever!: An brochure na ini may ekselenteng pan-akit sa mga hobenes siring man sa mga may limitadong abilidad sa pagbasa. Paano nindo ini puwedeng iintrodusir? Sa pantapos kan saindong pag-oolay manongod sa Kahadean, puwede nindong sabihon: “Bako daw mawot nindong mabuhay sa paraisong daga sa irarom kan Kahadean nin Dios? [Pasimbagon.] Mangnohon an magayon na ilustrasyon na ini kan paraiso digdi sa brochure na ini. [Buksan sa retrato 49, asin basahon an mga komento sa ibabaw kan retrato.] An brochure na ini makatatabang saindo na manodan kun paano kamo puwedeng mabuhay sagkod lamang sa daga kairiba kan siring na maoogmang mga tawo. Mapapasaindo ini sa kontribusyon na ₱4.20.”
4 The Government That Will Bring Paradise: An brochure na ini nagpopokus nin atension sa Kahadean nin Dios, na iyo an satong Topikong Mapag-oolayan sa masunod na bulan. Uya an saro pang paagi na puwede nindong ikonektar an brochure na ini sa Topikong Mapag-oolayan: “An mga bendisyon na ini na napag-olayan pa sana niato papangyarihon kan Kahadean nin Dios, na itinokdo sato ni Jesus na ipamibi. Mangnohon an pan-introduksion na mga tataramon sa brochure na ini sa pahina 3. [Basahon an enot na kabtang kan parapo.] Dangan sa pahina 29 ilinadawan an mga bendisyon na pangyayarihon kan Kahadean nin Dios sa katawohan. [Saro-saro na ipaheling an mga punto.] Siring kan sinasabi digdi sa pahina 30, kaipuhan niatong pag-adalan an Biblia tanganing makanood nin orog pa manongod sa Kahadean nin Dios asin an nagtotokdong brochure na ini makatatabang saindo sa bagay na ini. Mapapasaindo ini sa kontribusyon na ₱4.20 sana.”
5 The Divine Name That Will Endure Forever: Sierto nanggad na an mga nagmamawot kan mga bendisyon sa Kahadean nin Dios maninigong mamidbid si Jehova, an Dios nin kaogmahan. Kaya puwede nindong iintrodusir an brochure sa paaging ini: “Tanganing mag-ako kan mga bendisyon na ini an saro maninigong orog na mamidbid an Dios mismo. Ini an sarong dahelan kaya iinaalok niamo an nagtotokdong pantabang na ini sa pag-adal nin Biblia. [Ipaheling an brochure.] Bako sanang nagpapaliwanag ini kun ano an ngaran nin Dios kundi nagpapaheling man ini digdi sa pahina 31 kan kahalagahan sa pakaaram kan ngaran nin Dios. [Basahon an parapo 1.] Mapapasaindo an kopyang ini sa kontribusyon na ₱4.20.”
6 “Uya! Ginigibo Kong Bago an Gabos na Bagay”: Ekselente an brochure na ini sa pagtatao nin panbilog na punto-de-vista sa mga katuyohan nin Dios asin puwede man na gamiton sa pagpopoon nin pag-adal sa Biblia. Kaya, pakatapos na pag-olayan an mga kasuratan sa Topikong Mapag-oolayan, magigin marahay na sabihon an siring kaini: “Tanganing orog na ikaladawan kun ano an makangangalas na mga kamugtakan na pangyayarihon sa daga kan Kahadean nin Dios, mawot kong ipaheling saindo an de-kolor na brochure na ini. [Ipaheling kapwa an tutob sa enotan asin sa likod.] Bako daw mawot nindong mabuhay sa mga kamugtakan na siring kaini? [Pakomentohon.] An brochure na ini dinesenyo tanganing matabangan kamo na makanood nin orog pa kun paano kamo asin an saindong pamilya makaaandam na mabuhay sa paraiso. Mapapasaindo ini sa kontribusyon na ₱4.20 sana.”
7 Puwede kamong makanompong nin iba pang epektibong paagi sa pag-introdusir kan mga brochure sa paglilingkod sa Hulyo asin Agosto. Mag-andam nin marhay, asin logod tawan kamo ni Jehova nin kagayagayahan sa pag-aatubang kan maogmang bareta dara an mga brochure asin sa pagmamaigot na makapoon nin mga pag-adal sa Biblia sa mga nagpaheling nin interes.