Magin Mapasensia Asin Lubos sa Ministeryo
1 Si apostol Pablo mapasensia asin lubos sa paghuhulit kan maogmang bareta. Sinabihan nia an mga paraataman na taga-Efeso: “Dai ko ibinibilang na mahal sa sako an sakong kalag sa ano man na paagi, tangani sanang matapos ko an sakong gibohon asin an ministeryo na inako ko sa Kagurangnan na Jesus, na lubos na magpatotoo sa maogmang bareta.” (Gibo 20:24) Namamatean daw niato an pangangaipo na gibohon man an siring?—1 Cor. 9:16.
SA TERITORYONG PARATENG NAHUHULITAN
2 An pagpapasensia nangorognang kaipuhan kun an satong teritoryo parateng nahuhulitan. Sa ibong nin limitadong teritoryo maninigo kitang mapahiro na dumalaw nin paorootro. Gibohon an paghihingoa na makaolay an gabos na nag-iistar sa kada harong.
3 Kun an satong teritoryo parateng nahuhulitan, makakamidbid niato nin personal an mga kagharong. Tibaad huli kaini mas pamugtak an saindang boot na buksan an saindang pinto. May marahayon na mga suhestion sa librong Reasoning na magagamit niato tanganing gibohon na laen-laen an satong introduksion sa teritoryong parateng mahulitan.—Helingon an Reasoning, pahina 9-15.
4 Tibaad makanompong kita nin mga tawo na, minsan ngani nagpapaheling nin kadikit na interes, habong umako kan satong babasahon. Ano an maninigong magin reaksion niato? Maninigo na kita magin lubos sa paghihingoang mapatalubo an interes na iyan. An pag-ataman sa ikinatanom sa saindang puso tibaad sa huri magpahiro sa sainda na umako nin pag-adal sa Biblia. An sarong tugang sinongko nin limang sunod-sunod na semana an sarong kagharong na interesado na dai nakawawaras nin babasahon. Kan ikaanom na pagsongko, an kagharong nag-ako nin babasahon, asin sa huri naponan an pag-adal sa Biblia.
PAG-ALOK KAN MGA BROCHURE
5 Ngonyan na Agosto ipagpapadagos niatong gamiton an Topikong Mapag-oolayan na “Mas Marahay na mga Kamugtakan an Naghahalat Sato.” An topikong ini puwedeng gamiton sa pag-alok kan arin man sa mga brochure.
6 Halimbawa, puwede niatong sabihon: “Ano an punto-de-vista nindo manongod sa panuga nin tawo na papangyarihon an katoninongan sa kinaban? [Pasimbagon.] Sa nag-aging mga siglo, pinatunayan nin tawo na sa katunayan dai nia kayang pamahalaan an saiyang sadiri. Minsan siring, helinga an mapananarigan na panuga nin Dios. [Basahon an 2 Pedro 3:13.] Asin helinga an mga kamugtakan na mag-eeksister sa panahon na iyan. [Basahon an Kapahayagan 21:4.]” Dangan, kun ginagamit niato an brochure na “Uya!,” puwede niatong darahon an atension kan kagharong sa pahina 30, parapo 58. Sa brochure na Government, puwede niatong itampok an enot na parapo sa pahina 3. An retrato sa tutob kan brochure na Life on Earth tamang-tama sa Topikong Mapag-oolayan. Siring man, an ikatolong parapo sa pahina 31 kan brochure na Divine Name magagamit.
7 An mapasensia asin lubos na pagtapos sa satong teritoryo na dara an maogmang bareta magbubunga nin kaligtasan sa mga naghihinanyog sa sato.—1 Tim. 4:16.