Magin Bilog na Kalag sa Ministeryo sa Langtad
Kabtang 1: An Halaga nin Pagpahalaga ki Jehova
1 An pagigin bilog na kalag sa ministeryo minagikan sa mas hararom na pagpahalaga ki Jehova asin sa gabos na ginibo nia para sa sato. (2 Sam. 22:2, 3) An pagmakolog sa mga tawo maninigo man na magpahiro sato na maghingoa sa paglilingkod. (Mat. 9:36; 2 Cor. 5:14, 15) Mientras na orog kitang debotado ki Jehova asin mientras na orog kitang nagmamakolog sa mga tawo, orog man kitang mapahihirong entusiastikong makikabtang sa paglilingkod sa langtad. (Mat. 22:37-39) Sa siring an satuyang ministeryo nagigin kayamanan na dapat na pakamahalon. (2 Cor. 4:7) Pero paano daw mapatatalubo an siring na pagpahalaga?
MGA LIYABE SA PAGPAKOSOG NIN PAGPAPAHALAGA
2 An personal asin pankongregasyon na pag-adal sa Biblia kaiba an paghorophorop nakatatabang sato na mapatalubo an personal na relasyon ki Jehova. May sinusunod daw kamong iskedyul sa semanal na pagbasa sa Biblia? Regular daw nindong pinag-aadalan an mga publikasyon kan Sosyedad? Kamo daw nag-aandam para sa, nag-aatender, asin nakikikabtang sa gabos na pagtiripon kan kongregasyon? (Heb. 10:24, 25) An paghorophorop mapakosog man sa pagpapahalaga sa puso para ki Jehova asin sa pagsamba sa saiya.—Sal. 27:4.
3 An saro pang paagi na mapakosog an satong pagpahalaga iyo an paghorophorop sa halimbawa nin iba pang bilog na kalag na mga ministro. Si Jeremias napano nin malaad na kaigotan sa gibong itinao sa saiya. (Jer. 20:9) Si Jesus nagpaheling nin marahayon na arogan sa kaigotan. (Juan 4:34) Si Pablo nagpaheling nin pagpasalamat sa banal na pagkaherak na ipinaheling sa saiya. (1 Tim. 1:12, 13, 17) Mantang hinohorophorop niato an mga halimbawang ini, mapakokosog niato an pagpahalaga sa ministeryo.
4 Kun nanonodan niato an kamurawayan kan dignidad ni Jehova asin hinohorophorop niato an saiyang makangangalas na mga gibo, napahihiro kitang omawon sia nin may kagayagayahan. (Sal. 145:5-7) Ipinaheheling niato na mahal niato an satong mga oportunidad na magpatotoo sa banal na ngaran paagi sa paghanap nin mga paagi na ikalakop an mensahe kan Kahadean.—Luc. 6:45.
5 Alagad igwa pa daw nin ibang mga bagay na makamomotibar kan satong bilog na kalag na pakikikabtang sa ministeryo? Kun igwa, ano iyan? Paano makatatabang an kamagurangan, ministeryal na mga lingkod, payunir asin iba pang eksperyensiadong parahayag? Ano an kabtang nin mga pasohan sa pagpatalubo sa entusiasmo? An mga hapot na ini asin iba pa sisimbagon sa may limang kabtang na seryeng ini, na ipagpapadagos sa masurunod na luwas kan An Satong Ministeryo sa Kahadean.