An Patienot na Pag-andam Nagtatao nin Kagayagayahan
1 An pakikikabtang sa ministeryo sa langtad nagtatao sa sato nin dakulang kagayagayahan. (Sal. 89:15, 16) Siempre, an pag-andam importanteng marhay sa lubos na pakaeksperyensia kan kagayagayahan na iyan. Mientras na kita nag-aandam nin mas marahay, mas dakol man kitang nagigibo, asin mientras na mas dakol kitang nagigibo, mas dakula man an kagayagayahan niato.
2 Gamiton an Itinataong mga Kasangkapan: Ponan an saindong pag-andam paagi sa pagbasa asin pag-analisar kan materyal sa An Satong Ministeryo sa Kahadean. Iyan parateng nagtatao nin pinag-isipan na marhay na mga pag-atubang na dinisenyo tangani na tabangan kamong iatubang an mensahe kan Kahadean sa pasil asin epektibong paagi. Makakukua kamo nin mga halimbawa sa kun paano mapanggaganahan an komun na mga pagkontra. May itinataong espesipikong mga ideya sa kun paano magibo nin epektibong pagdalaw liwat, na may pasohan na makapoon nin pag-adal sa Biblia. Igwa kamo nin katalingkasan na ibagay an mga suhestion na ini sagkod sa punto na komportable na kamo sa paggamit kaiyan. Dugang pa digdi, igwa kamo kan librong Reasoning, na nagtatao nin dakol na laen-laen na introduksion saka simbag sa mga pampapondo sa orolay, sa siring tinatabangan kamong magin orog na epektibo sa dakol na situwasyon na nanunuparan nindo.
3 Helingon an publikasyon na iaalok nindo, asin pumili nin saro o duwang punto na nakaaapod nin atension na puede nindong ipaheling sa kagharong. An sarong nakapupukaw nin isip na bareta na nadangog o nabasa nindo puedeng magtao sa saindo nin introduksion sa pagpoon nin pakikipag-olay. Antisiparon an komun na mga pagkontra na posibleng manuparan nindo, asin isaisip an pirang ideya sa kun paano kamo puedeng sumimbag. Dangan praktison nin pirang minuto an sasabihon nindo sa pinto.
4 Atenderan an Gabos na Pagtiripon sa Paglilingkod: Maghinanyog nin maingat durante kan Pagtiripon sa Paglilingkod kun ipinaliliwanag, rinerepaso, asin idinedemonstrar an itinaong mga suhestion sa An Satong Ministeryo sa Kahadean. Tawan nin atension an mga ideya na sa paghona nindo puedeng iiba sa saindong pag-atubang. Girumdomon an nagkapira sa komun na mga situwasyon na nanuparan nindo sa ministeryo, asin umisip nin mga paagi na kamo makapaghulit nin mas epektibo. Ipakipag-olay an mga bagay na ini sa ibang parahayag bago asin pakatapos kan pagtiripon.
5 Makaseseguro kamo na kun kamo “andam para sa lambang marahay na gibo,” babalosan kamo nin mas dakulang kagayagayahan asin kapangganahan sa pagtabang sa iba na manompongan an dalan pasiring sa buhay.—2 Tim. 2:21.