Kun Iyan Nagbubunga, Gamiton Iyan!
1 An Satong Ministeryo sa Kahadean padagos na tinatawan kita nin manlaenlaen na isinuherir na pag-atubang na magagamit sa ministeryo. Tinatawan kita kaini nin bagong mga ideya kun paano makapupukaw nin interes sa mensahe kan Kahadean. Tibaad naghihingoa kamo kada bulan na manodan an saro o labi pa kan mga pag-atubang na ini. Minsan siring, tibaad nanonompongan nin nagkapirang parahayag na sa panahon na nagamit na ninda nin pirang beses an saro kaiyan, an saro na naman na isyu kan An Satong Ministeryo sa Kahadean magtatao nin bagong mga pag-atubang. Natural sana na tibaad bakong posible para sa gabos na manodan an bagong pag-atubang bago magin eksperto sa nakaagi.
2 Siempre, may rinibong payunir asin iba pang parahayag na naggagamit nin dakol na oras sa paglilingkod sa langtad. Apuera kaini, dakol na kongregasyon an naghuhulit sa bilog nindang teritoryo kada pirang semana. Sa mga kamugtakan na ini, pinahahalagahan nin mga parahayag an pagkaigwa nin bagong mga pagdolok asin ideya para sa pag-atubang kan mensahe. Tinatabangan sinda kaini na mapaoswag an saindang mga abilidad. Ginigibo man kaiyan an saindang ministeryo na orog na interesante asin mabunga patin tinatabangan sinda na atubangon an mga angat na nanunuparan.
3 Sa ano man na situwasyon, kun nakapag-andam na kamo nin pag-atubang na epektibong marhay sa pagkultibar nin interes, padagos nanggad na gamiton iyan! Dai man kaipuhan na ipondo an paggamit nin epektibong pag-atubang kun iyan nagbubunga. Ibagay sana iyan sa alok para sa presenteng bulan. Mantang rinerepaso nindo an mga suhestion na itinatao sa An Satong Ministeryo sa Kahadean, hanapon an interesanteng mga punto na tibaad gusto nindong iiba sa saindong pag-atubang.
4 Kaya kun maresibi nindo an bagong isyu kan An Satong Ministeryo sa Kahadean, girumdomon na an mga pag-atubang na yaon dian mga suhestion sana. Kun magagamit nindo iyan, marahay. Alagad kun nakanompong na kamo nin pag-atubang na nagbubunga sa saindong teritoryo, gamiton iyan! An mahalaga iyo na ‘lubos na otobon an saindong ministeryo’ sa marahay na paagi, na hinahanap an mga maninigo asin tinatabangan sinda na magin mga disipulo.—2 Tim. 4:5.