Mga Saksi ni Jehova—Tunay na mga Paraebanghelyo
1 Ibinugtak ni Jesu-Cristo sa gabos niang disipulo an paninimbagan na mag-ebanghelyo, na espesipikong dinidirehiran sinda na ihulit an maogmang bareta kan Kahadean. (Mat. 24:14; Gibo 10:42) Nagtao an saiyang mga disipulo nin arogan digdi mantang sinda dai nin ontok na nakikipag-olay dapit sa Kahadean—bako sanang sa mga lugar nin pagsamba kundi saen man ninda manompongan an mga tawo sa publiko asin sa pagharongharong. (Gibo 5:42; 20:20) Bilang Mga Saksi ni Jehova ngonyan, pinatunayan niato na kita tunay na Kristianong mga paraebanghelyo, na naghuhulit kan mensahe nin Kahadean sa 232 na kadagaan asin binautismohan an labing sarong milyon na bagong disipulo kan nakaagi pa sanang tolong taon! Taano an satong pag-ebanghelyo ta nagin mapangganang marhay?
2 Nakapaoogma sa Sato an Maogmang Bareta: An mga paraebanghelyo mga parahulit, o mensahero kan maogmang bareta. Bilang siring, yaon sa sato an nakaoogmang pribilehio na ipaisi an Kahadean ni Jehova—an solamenteng tunay na maogmang bareta na puedeng itao sa napupurisaw na katawohan. Entusiastiko kita manongod sa dakol na kaaraman na nakamtan niato dapit sa sarong bagong kalangitan na matanos na mamamahala sa sarong bagong daga na kompuesto nin fiel na katawohan sa maabot na Paraiso. (2 Ped. 3:13, 17) Kita sana an mga maogmang nag-ako kan paglaom na ini, asin galaga kitang ihiras iyan sa iba.
3 Minomotibar Kita kan Tunay na Pagkamoot: An pag-ebanghelyo nagliligtas-buhay na gibohon. (Roma 1:16) Iyan an dahelan kun taano ta naeeksperyensiahan niato an dakulang kagayagayahan sa pagpalakop kan mensahe nin Kahadean. Bilang tunay na mga paraebanghelyo, namomotan niato an mga tawo, asin pinahihiro kita kaiyan na ihiras an maogmang bareta sa sainda—sa satong mga pamilya, kataed, kamidbid, asin sa pinakadakol na iba pang mapupuede. An bilog na pusong paggibo kaini saro sa pinakamarahay na mga kapahayagan niato kan satong tunay na pagkamoot sa iba.—1 Tes. 2:8.
4 Sinusuportaran Kita kan Espiritu nin Dios: Inaasegurar kita kan Tataramon nin Dios na kun ginigibo niato an pagtanom asin pagbaribi kan banhi nin Kahadean, si Jehova an “nagpapatubo kaiyan.” Iyan talaga an naheheling niato na nangyayari sa satong organisasyon ngonyan. (1 Cor. 3:5-7) An espiritu nin Dios an nagsusuportar sa sato sa satong pag-ebanghelyo asin nagtatao sa sato nin dakulang kapangganahan.—Joel 2:28, 29.
5 Huli sa pagparigon sa boot na nasa 2 Timoteo 4:5 na ‘gibohon an gibohon nin sarong paraebanghelyo,’ an sato logod na pagkamoot sa gabos na tawo motibaron kita na ihiras an nakaoogmang marahay na bareta kan Kahadean sa gabos na oportunidad, na kompiado na padagos na bebendisyonan ni Jehova an satong gibohon.