Mag-ogma sa Pagtao nin Lubos na Pagpatotoo
1 Kita gabos naoogma sa paggibo kan mga bagay na nagigibo niato nin marahay. Nagsasabi an Marcos 7:37 na an kaburonyogan nagpahayag mapadapit ki Jesus: “Marahay an pagkagibo nia sa gabos na bagay.” Bakong makangangalas na ikinaogma ni Jesus an paggibo kan kabotan ni Jehova! (Ikomparar an Salmo 40:8.) Paagi sa pag-isip-isip sa minasunod na mga suhestion, kita man makanonompong nin kagayagayahan mantang kinukuyog niato an pagboot ni Jesus “na maghulit sa mga tawo asin magtao nin lubos na pagpatotoo.” (Gibo 10:42) Ngonyan na Enero iaalok niato an arin man na 192 na pahinang libro na ipinublikar bago kan 1985 na tibaad yaon sa istak kan kongregasyon o an librong Mabuhay Sagkod Lamang. Paano niato magagamit an mga publikasyon na ini sa pagtao nin lubos na pagpatotoo?
2 Mantang an mga tawo parateng nahahadit dapit sa mga isyu sa salud, puede nindong sabihon ini:
◼ “Sa ibong kan mahalagang mga nagibo sa langtad nin medisina, igwa nin grabeng pagdusa huli sa helang. Sa saindong opinyon, taano ta arog kaini? [Pasimbagon.] Nagsabi si Jesu-Cristo na an peste magigin kabtang kan huring mga aldaw. (Luc. 21:11) Pero an Biblia naglaladawan man sa sarong panahon na mawawara na an helang. [Basahon an Isaias 33:24.] Mangnoha kun paano an sadit na librong ini nagtataong paglaom sa pangenot na katokdoan na iyan kan Biblia.” Itampok an angay na mga komento sa libro na iinaatubang nindo asin ialok iyan sa dating kontribusyon.
3 Kun impormal na nagpapatotoo harani sa mga sentrong pamakalan, puede kamong magtaratara dangan ihapot:
◼ “Namamasdan daw nindo na padagos na nagmamahal na gayo an mga bagay ngonyan na mga aldaw kaya depisil na mapagkanigo an kuarta? [Pasimbagon.] Sa paghona daw nindo maabot pa an panahon na magkakaigwa nin tunay na seguridad sa ekonomiya?” [Pasimbagon.] Dangan itampok an sarong angay na kotasyon sa Kasuratan hale sa libro na iinaalok nindo. Magpadagos paagi sa pagsabi: “Ipinaheheling kan librong ini kun paano reresolberan nin Dios, paagi sa saiyang Kahadean, an mga problema na nagpapasakit na marhay sa buhay ngonyan.” Ialok an libro sa dating kontribusyon. Puede nindong sabihon na ikinaogma nindong marhay an pag-orolay, asin ihapot: “Igwa daw nin paagi na ikapadagos niato an pag-orolay na ini sa ibang panahon?” Paagi kaini tibaad makua nindo an numero kan telepono o adres kan harong kan tawong iyan.
4 Tibaad magkaigwa kamo nin oportunidad na probaran an pag-atubang na ini manongod sa katoninongan kan kinaban, na ginagamit an librong “Mabuhay Sagkod Lamang”:
◼ “Sa saindong opinyon, taano ta masakit na gayong makamtan an katoninongan kan kinaban? [Pasimbagon, dangan ipaheling an ilustrasyon na nasa pahina 20-1.] Ini retrato nin sarong pangyayari sa Biblia na ilinadawan sa Kapahayagan. [Direktang basahon sa parapo 17 an Kapahayagan 12:7-9, 12. Dangan basahon an kapsion na nasa retrato.] An kadaihan nin katoninongan kan kinaban saro sa mga epekto kan paghologan sa Diablo digdi sa daga. Sinisimbag kan librong ini an dakol na importanteng hapot, asin naoogma akong magkaigwa kamo kaiyan. [Sabihon an kontribusyon.]”—Tangani na makakua nin iba pang epektibong mga paagi sa pag-atubang kan librong Mabuhay Sagkod Lamang, helingon an likod na pahina kan Setyembre 1995, Pebrero 1995, Setyembre 1994, Setyembre 1993 na mga isyu kan An Satong Ministeryo sa Kahadean.
5 Kun minadalaw liwat tangani na maasikaso an mga nagpapaheling nin interes, puede nindong pagmaigotan na makapoon nin pag-adal sa Biblia paagi sa pag-adaptar kan pagdolok na ini:
◼ “Kan huri kitang mag-olay, interesanteng marhay an komento nindo. [Sambiton an ikinomento kan indibiduwal.] Pinagparaisip ko an manongod dian, asin boot kong ihiras sa saindo an mga resulta kan nagkapirang pagsiyasat ko sa temang iyan. [Isabi an angay na teksto.] Nag-aalok kami na magkondukta nin kursong pag-adal na mayong bayad na nagpangyari sa minilyon na tawo na masiyasat an pangenot na mga katokdoan kan Biblia sa halipot na panahon. An siring na pagsiyasat puedeng makaparigon kan saindong kompiansa sa siertong kaotoban kan mga panuga nin Dios.” Itampok an nagkapirang hapot na sisimbagon. Kun sayumahan kan tawo an alok na pag-adal sa Biblia, ipaliwanag na igwa man kita nin espesyal na pinahalipot na kurso na 15 minutos sana kada semana sa laog nin 16 na semana. Ipaheling an brosyur na Kahagadan, buksan sa leksion 1, asin hapoton kun puede nindong idemonstrar an enot na leksion.
6 Girumdomon na Gamiton an mga Handbill: Puede iyan na gamiton nin epektibo sa saindong introduksion tangani na mapukaw an interes sa espirituwal na mga bagay, o puede iyan na ialok kun dai mag-ako nin literatura. Kun interesado, gamiton an inimprentang mensahe sa likod kan handbill tangani na enkaminaron an tawo na umako nin pag-adal sa Biblia sa harong asin umatender sa satong mga pagtiripon.
7 Magin eksperto sa saindong gibohon, asin magigin kamong magayagaya dian. Pirme nindong atenderan an pagtao nin lubos na pagpatotoo, asin ikaogma an paggibo kan gabos na kabtang kan ministeryo.—1 Tim. 4:16.