Maghulit na May Pakarorop
1 Tanganing magkaigwa nin pakarorop nangangaipo na may nasasabotan kita dapit sa mga tawo na hinuhulitan niato. Taano? Huli ta an satong kapangganahan sa pagtaros sa puso kan mga tawo depende sa satong abilidad na iatubang an mensahe kan Kahadean sa paagi na nakaaakit sa sainda. Durante kan bulan na ini nin Enero, iaalok niato an librong Mankind’s Search for God, o an librong True Peace and Security—How Can You Find It? An minasunod na mga suhestion puedeng makatabang.
2 Kun iinaalok an librong “Mankind’s Search for God,” puede kamong magpoon paagi sa pagsabi:
◼ “Interesante na makaolay an mga tawo na may laen-laen na relihion. Alagad dai daw nindo nariparo na an kadaklan na tawo kontento na sa relihion kan saindang mga magurang imbes na hanapon mismo ninda an Dios? [Pakomentohon.] An librong ini, na Mankind’s Search for God, nagsisiyasat kan mga katokdoan kan mayor na mga relihion asin ikinokomparar iyan sa Biblia. Mangnoha an limang hapot na ini digdi sa pahina 17, parapo 28, na makatatabang sa sato na siyasaton an satong mga paniniwala kun ikokomparar sa Biblia.” Basahon sa halipot an mga hapot dangan imbitaran an kagharong na kuanon an libro asin personal na siyasaton an mga hapot na ini. Mag-alok na bumalik liwat para sa orog pang pag-orolay.
3 O, pakapamidbid nindo, puede kamong magsabi:
◼ “Huli sa kadakoldakol na relihion ngonyan, napag-isip-isip na daw nindo kun paano kita makasisierto kun baga inooyonan nin Dios an satong relihion?” Pakakomento kan kagharong, buksan sa pahina 377 kan librong Search for God asin ipaheling an sampulong paagi na mamimidbid niato an tunay na relihion. Darahon an atension partikularmente sa punto numero 6, asin basahon an Miqueas 4:2-4. Dangan hapoton an kagharong kun pirang relihion an nakaaabot sa kahagadan na ini ngonyan. Ialok sa saiya an libro tanganing masiyasat nia asin iareglo na madalaw liwat tangani na mapag-olayan nin orog pa an bagay na ini.
4 Nanompongan nin dakol na an pagbukas sana nin sarong kapitulo sa librong Search for God na nagpapaliwanag kan relihion kan kagharong nakatatabang na makua an saiyang atension. Tibaad boot nindong probaran ini nangorogna sa mga bakong Kristiano.
5 Kun napili nindong ialok an librong “True Peace and Security—How Can You Find It?” puede nindong ipaheling an ilustrasyon sa pahina 4 asin sabihon:
◼ “An ilustrasyon na ini nagpapaheling kun ano an itinotokdo kan Biblia dapit sa katuyohan nin Dios para sa daga. Ano sa paghona nindo an hahagadon sa saindo asin sa saindong pamilya tangani na makaistar sa sarong paraisong daga? [Pasimbagon.] Ipinaheheling kan Biblia na sa dai na mahahaloy an tunay na katoninongan asin katiwasayan magigin sarong katunayan sa bilog na daga asin na ibabalik an Paraiso. [Basahon an Salmo 37:10, 11.] Ikapaheheling kan librong ini saindo an kaipuhan na gibohon nindo tangani na makinabang sa gigibohon nin Dios. Boot kong iwalat saindo an kopyang ini.”
6 An marahay na pakarorop magpapangyari sa sato na mamansayan an mga pangangaipo asin interes kan mga tawo na satong nanonompongan. An Talinhaga 16:23 inaasegurar kita kaini, na nagsasabi: “An puso kan madonong nagpapangyari sa saiyang ngoso na magpaheling nin pakarorop, asin sa saiyang mga ngabil iyan nakadadagdag nin pan-agyat.”