Makinabang sa Teokratikong Paadalan sa Pagmiministro Para sa 1996—Kabtang 1
1 Nabasa na daw nindo an mga instruksion na itinao sa “Theocratic Ministry School Schedule for 1996”? Namangno daw nindo an nagkapirang pagbabago? Poon ngonyan na Enero sagkod Abril, an Asignasyon Num. 3 basado sa librong Reasoning, asin poon Mayo sagkod Disyembre, iyan basado sa bagong luwas na librong Kaaraman. An Asignasyon Num. 4 sarong pahayag manongod sa laen man na personahe sa Biblia kada semana.
2 Mga Asignasyon kan Estudyante: An Asignasyon Num. 3 itatao sa sarong tugang na babae. Kun iyan basado sa librong Reasoning, an eksena maninigong pagharongharong o impormal na pagpatotoo. Kun basado sa librong Kaaraman, maninigo iyan na iatubang bilang sarong pagdalaw liwat o pag-adal sa Biblia sa harong. Ini makatatabang na marhay, huling an librong Kaaraman gagamiton na marhay sa pagkondukta nin mga pag-adal sa Biblia sa harong.
3 Kun an eksena sarong pag-adal sa Biblia sa harong, puedeng pareho nakatukaw an mga tugang na babae. Dumiretso sa pag-adal paagi sa haralipot na komentong pan-introduksion, dangan ihapot an nakaimprentang hapot. An kabtang kan kagharong maninigong gibohon na realistiko. Puedeng buksan an sitadong mga teksto asin basahon sagkod na may oras. Maninigong gamiton kan tugang na babae an abilidad sa pagtotokdo paagi sa mga paghapot sa kagharong asin paagi sa pangangatanosan sa mga tekstong ginamit.
4 Ano an maninigong gibohon kun an mga tekstong sinitar sa asignasyon sobra sa ikapaliliwanag sa laog nin limang minuto? Pumili nin pangenot na mga teksto na nagtatampok kan pangenot na mga punto. Kun may pipira sanang teksto, puedeng orog na pag-olayan an pangenot na mga punto sa leksion. Sa panapanahon, an sarong parapo o sentence sa libro puedeng basahon dangan ipakipag-olay sa kagharong.
5 An kahon na may titulong “Baloon an Saindong Kaaraman,” na makukua sa poro kan kada kapitulo kan librong Kaaraman, puedeng repasohon sa halipot kan parahayag na an asignasyon kinokobrehan an ultimong parapo kan kapitulo. An mga kahon nin impormasyon na sakop kan asignadong mga parapo puede man na pag-olayan sagkod na may oras. Kun an kahon nin impormasyon nasa pag-oltanan nin duwang asignasyon, an tugang na babae na matao kan enot na asignasyon puedeng konsideraron iyan. An mga ilustrasyon sa libro puedeng komentohan kun iyan minaaplikar sa materyal na pinag-oolayan.
6 An Asignasyon Num. 4 malalaoman na magin interesanteng gayo asin praktikal. Kada semana ipaliliwanag kaiyan an sarong tunay na buhay na halimbawa—sarong personahe sa Biblia. Maingat na pag-adalan an sinasabi kan Insight, Tomo 1, dapit sa asignadong personahe sa Biblia. Bilogon an pahayag na nakasentro sa tema, asin pilion an pangenot na mga teksto sa Biblia na matabang sa mga nagdadangog na isentro an atension sa personahe sa Biblia asin sa saiyang personalidad, kabale na an mga karakteristiko, ugale, o inklinasyon na boot niatong magsalang arogon o isikwal. An mga teksto na bakong direktang konektado sa personahe sa Biblia puedeng iiba kun iyan nagtatampok kan punto-de-vista ni Jehova sa marahay o maraot na mga ugale o kun konektado iyan sa tema kan pahayag.
7 Kun lubos niatong aaprobetsaran an pagsasanay na itinatao sa paadalan, orog niatong ‘ikahuhulit an tataramon’ sa paagi na nagpapaheling kan marahay na “abilidad sa pagtotokdo.”—2 Tim. 4:2.