Makinabang sa 1999 Programa sa Teokratikong Paadalan sa Pagmiministro
1 Si Jesus an Pangenot na Paratokdo. An mga tawo ‘nagngalas sa saiyang paagi nin pagtotokdo.’ (Mar. 1:22) Minsan ngani mayo sa sato na makapagtataram asin makapagtotokdo nin siring karahay ki Jesus, puede kitang maghingoa na arogon sia. (Gibo 4:13) Sa katuyohan na iyan, an satong pakikikabtang sa programa sa Teokratikong Paadalan sa Pagmiministro makatatabang sa sato na padagos na paoswagon an satong mga abilidad sa pagtaram asin pagtotokdo.
2 Sa 1999, an Asignasyon Num. 1 sa kadaklan basado sa mga artikulo hale sa 1997 mga magasin na Torrengbantayan asin Awake! Orog pang madadagdagan an satong pakasabot sa espirituwal na mga bagay kun babasahon niato nin patienot an impormasyon na ini dangan dangogon iyan sa programa sa paadalan. An mga naasignaran na magtao kaining mga pahayag na nagtotokdo maninigo na gumibo nin praktikal na pag-aplikar kan materyal, na iinaatubang iyan sa interesante asin buhay na paagi. An Asignasyon Num. 3 ibabasar sa librong Kaogmahan nin Pamilya, asin an Asignasyon Num. 4, sa sarong personahe sa Biblia, maski ngani an pinagkuanan na materyal puedeng sarosalida sa mga asignasyon na ini. An materyal maninigo na maingat na estudyaran kan paraataman sa paadalan bago mag-asignar kan mga kabtang. An gabos na estudyanteng naasignaran na magtao kan materyal gikan sa librong Kaogmahan nin Pamilya maninigo na arogan sa sainda mismong buhay pampamilya.
3 Iaplikar an Konseho, Asin Mag-andam na Marhay: An gabos makagigibo nin dugang pang pag-oswag sa abilidad nin pagtaram asin pagtotokdo. (1 Tim. 4:13) Huli kaini, maninigo kitang humagad nin konseho, asin nungkang mansayon iyan bilang bagay na dapat likayan. (Tal. 12:15; 19:20) An epektibong pag-atubang kan katotoohan sa mga pagtiripon asin sa ministeryo sa langtad nagkakaipo nin orog pa sa pagsaysay sana nin mga impormasyon o pagbasa nin mga teksto sa mekanikal na paagi. Kaipuhan niatong taroson an puso asin motibaron an mga naghihinanyog sa sato. Magigibo niato ini paagi sa pagtaram kan katotoohan sa nakakokombensir na paagi gikan sa satong puso. (Ikomparar an Gibo 2:37.) An konseho na inaako niato sa paadalan makatatabang sa sato na magibo ini.
4 Pagkaresibi tolos nindo nin asignasyon, horophoropon an mga kualidad sa pagtaram na paooswagon nindo siring kan ipinaliwanag sa School Guidebook. Estudyaran kun ano an kaipuhan nindong gibohon tangani na ikaaplikar an nakaaging konseho na inako nindo. Horophoropon an saindong tema, an eksena na gagamiton nindo kun kaipuhan, asin kun paano nindo iaaplikar an mga teksto na yaon sa iinasignar sa saindo na materyal. Pensaron kun paano pinakamarahay na magagamit an impormasyon sa pagtokdo asin pagmotibar.—1 Tim. 4:15, 16.
5 Kun nahahandal kamo dapit sa pagpalista sa paadalan, ipamibi iyan dangan ipakipag-olay sa paraataman sa paadalan an saindong mga namamatean. An gabos makikinabang paagi sa lubos na pag-aprobetsar sa programa na iaatubang sa 1999 Teokratikong Paadalan sa Pagmiministro.