Magpaheling nin Personal na Interes—Paagi sa Pagigin Andam
1 An marahay na pag-andam para sa ministeryo nakakatabang sa sato na magpaheling nin personal na interes sa iba. Taano man? Kun kita andam na marhay, daing gayo kita mahahadit sa satong sasabihon asin sa siring matatawan niato nin orog na atension an kagharong. Dugang pa, iyan nakakatabang sa sato na mapangganahan an nerbios asin nagtotogot sa sato na magtaram gikan sa puso. Pero, paano kita makakapag-andam nin epektibong pag-atubang?
2 Gumamit nin Angay na Pag-atubang: Pumili sa An Satong Ministeryo sa Kahadean na Enero 2006 nin saro sa isinuherir na mga pag-atubang na angay sa saindong lugar, asin estudyaran kun paano nindo iyan sasabihon sa sadiri nindong tataramon. Ibagay iyan sa saindong teritoryo. Halimbawa, kun parate kamong nakakanompong nin mga tawo na iba an relihion o etnikong pinaghalean, isip-isipon nindo kun paano magigin interesante para sa sainda an saindong pag-atubang. An pagbagay kan saindong pag-atubang sa mga indibiduwal na nakakaolay nindo nagpapabanaag nin sinserong interes sa sainda.—1 Cor. 9:22.
3 Mantang pinoponan nindong gamiton an pag-atubang, padagos na pakarhayon iyan. Mantang nangorognang importante an enot na mga tataramon, mangnohon kun ano an reaksion nin mga tawo sa saindong introduksion. Interesante daw para sa sainda an tema? Sinisimbag daw an mga hapot na ibinabangon nindo? Kun dai, gumibo nin mga pagliliwat sagkod na makanompong kamo nin pag-atubang na epektibo.
4 Mga Pantabang sa Memorya: Dakol an nadedepisilan na magirumdoman an pag-atubang kun sinda nasa may pinto na kan kagharong. Kun nangyayari iyan sa saindo, naprobaran na daw nindo na magkaigwa nin berbal na mga pag-ensayo kan presentasyon kaiba an saro pang tawo? Makakatabang ini sa saindo na makua nin malinaw sa isip an mga ideya asin ikaatubang iyan sa simple asin lohikong paagi. Puede man kamong andamon kaiyan na atubangon an laen-laen na reaksion nin mga kagharong.
5 An saro pang pantabang sa memorya iyo an pagsurat sa sadit na papel nin halipot na sumaryo kan pag-atubang asin helingon iyan bago kamo dumolok sa may pinto. Nanompongan nin nagkapira na an halipot na pagirumdom na ini nakakatabang sa sainda na magin mas relaks asin orog na may kakayahan na makipag-olay sa mga tawo. Sa mga paaging ini, an marahay na pag-andam makakatabang sa sato na magpaheling nin personal na interes sa iba asin sa siring makakapaoswag kan satong pag-atubang kan maogmang bareta.