Magpaheling nin Personal na Interes—Paagi sa Pagigin Madaling Makibagay
1 Si apostol Pablo nagtao nin marahay na halimbawa sa pirmeng pagbagay kan saiyang pag-atubang kan maogmang bareta sa kamugtakan asin kaisipan kan mga nagdadangog sa saiya. (1 Cor. 9:19-23) Maninigo na hingoahon niato na gibohon man iyan. Paagi sa dikit na pagplano antes pa, sa parate puede niatong ibagay an sampol na mga pag-atubang na yaon sa An Satong Ministeryo sa Kahadean sa mga pangangaipo kan mga tawo sa satong teritoryo. Mantang kita minadolok sa may pinto, tibaad mariparo niato an nagpaparisa kan mga pinagkakainteresan kan kagharong asin iiba an mga ini sa satong pag-atubang. Minsan siring, may iba pang paagi na puede kitang magin madaling makibagay sa satong ministeryo.
2 Ibagay an Pag-atubang Sono sa Sinasabi kan Kagharong: Kun iinaatubang an maogmang bareta, parate kitang nagpapalataw nin hapot asin iniimbitaran an mga kagharong na sumimbag. Paano nindo minamansay an simbag? May tendensia daw kamo na paramas sanang rekonoseron iyan asin magpadagos sana sa saindong iinandam na pag-atubang? O ipinapabanaag daw kan sinasabi nindo na kinokonsiderar nindo an komento kan mga kagharong? Kun nagpapaheling kamo nin sinserong interes sa sinasabi kan iba, tibaad makagamit kamo nin dugang pang mataktikang mga hapot tanganing maaraman kun ano talaga an nasa isip ninda. (Tal. 20:5) Sa siring makakakonsentrar kamo sa mga aspekto kan mensahe kan Kahadean na direktang marhay na nagtotokar kan mga ikinakapurisaw kan naghihinanyog sa saindo.
3 Hinahagad kaini na magin andam kitang makipag-olay manongod sa mga tema na laen man sa mga plinano na niatong ipakipag-olay. Kun minapoon kita paagi sa pagkomento dapit sa sarong problema na nasa mga bareta asin an sinasambit kan kagharong sarong lokal o personal na isyu na nakakapurisaw sa saiya, an satong tunay na interes sa pagtao kan mga pangangaipo kan kagharong mapahiro sa sato na isentro an pag-orolay sa Biblia sa kun ano an mahalagang marhay para sa saiya.—Fil. 2:4.
4 Pagbagay kan Satong Pamamaagi: Kun an kagharong nagpapalataw nin hapot, tibaad manompongan niato na kapakipakinabang na ipadagos an pakikipag-olay sa huri pagkatapos na makahanap kita nin dugang na impormasyon dapit sa tema. Puede man kitang mag-alok nin mga publikasyon na mas detalyadong nagtotokar kan tema. Ipinapabanaag kan gabos na ini an satong sinserong interes sa pagtabang sa iba na mamidbid si Jehova.—2 Cor. 2:17.