Pag-aatubang kan Maogmang Bareta—Na May Pagmansay
1 Idinoon ni apostol Pablo an pangangaipo na gumamit nin pagmansay sa pag-aatubang kan maogmang bareta sa mga tawo na laen-laen an paniniwala asin ginikanan. Sa satong kaaldawan, an iba naghihingakong relihiyoso, mantang an iba daing hilig sa espirituwal asin dai nagpapahalaga sa espirituwal na mga pamantayan. Bilang mga parahayag kan maogmang bareta, kaipuhan na gibohon niatong nakaaakit an mensahe kan Kahadean “sa gabos na klase nin tawo” paagi sa paggamit nin pagmansay sa ministeryo.—1 Cor. 9:19-23.
PAGSABOT SA KAGHARONG
2 An paggamit nin pagmansay sa paglilingkod sa langtad kalabot an abilidad na iangay an satong pag-aatubang sa pinagkakainteresan kan kagharong. Ini nagkakaipo nin marahay na pag-andam paagi sa pagigin pamilyar na gayo sa kadakol na manlaenlaen na tema na ipinaliliwanag sa satong mga publikasyon.
PAG-ANGAY KAN SAINDONG PAG-AATUBANG
3 Kun sa pagdolok nindo sa harong mamasdan nindo an mga kawatan o aki, puwede nindong ponan an presenteng Topikong Mapag-oolayan sa pagsabi: “Kinakaolay mi an mga magurang sa komunidad na ini manongod sa mga giyang itinatao ninda sa saindang mga aki. Dakol na magurang an ikinahahadit an kakulangan nin moral na paggiya sa mga aki sa eskuwelahan. Naobserbaran daw nindo an problema sa bagay na ini?” Hinanyogon an simbag kan kagharong. Kun ipinarisa kan simbag na an kagharong may hilig sa relihiyon, puwede nindong ipadagos: “Interesante nanggad na an Biblia nagtotokdo sa pangangaipo niato asin kan satong mga aki na mag-ako nin madonong na paggiya. Helinga an sinasabi digdi sa Talinhaga 14:12.” Pakabasaha kan teksto, puwede nindong sabihon: “May binabasa ako kasuarin pa sana na nagdoon kun gurano kapraktikal para sa sato kan hatol kan Biblia.” Buksan sa pahina 174 kan The Bible—God’s Word or Man’s? asin basahon an ultimong parapo sa kapitulo. Ialok an libro sa kontribusyon na ₱16.00.
4 Kun ipinaririsa kan simbag kan kagharong na dai nia pinahahalagahan an hatol kan Biblia, puwede kamong magpaheling nin pagmansay paagi sa pagliwat sa saindong pag-aatubang asin pagsabi: “Puwede daw tabi na hapoton ko kamo kun taano ta siring an saindong konklusyon?” Pakahinanyoga sa simbag, puwede nindong sabihon pa: “Nasasabotan ko kun taano ta siring an saindong saboot. An totoo, kasuarin pa sana may nabasa ako sa publikasyon na ini na nasisierto kong magigin interesante para sa saindo.” Buksan sa pahina 6 asin basahon an parapo 3 asin 4. Basahon man an enot na sentence sa parapo 5 sa pahina 7. Ihapot sa kagharong kun boot niang maaraman kun ano an inaako nin ibang tawo bilang pruweba na mapaniniwalaan an Biblia.
5 Mantang kita nag-aandam nin marhay asin nagpapaheling nin pagmansay sa paglilingkod ki Jehova, masasabi niato an arog kan sinabi ni apostol Pablo, “Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira.”—1 Cor. 9:22; Tal. 19:8.