Mapangganang Pakikikabtang sa Satong Panligtas-Buhay na Ministeryo
1 Ibinagay ni apostol Pablo an saiyang pag-atubang kan maogmang bareta tangani na “sa gabos na paagi ikaligtas [nia] an nagkapira.” (1 Cor. 9:19-23) Kaagid kaiyan, kita orog na magigin mapanggana sa satong ministeryo kun kita listo na mansayon an intereses kan kagharong asin kita preparado na ibagay an satong pakikipag-olay sa saiyang mga pangangaipo.
2 Pakapamidbid nindo, puede kamong magpoon paagi sa pagsabi sa sadiri nindong mga tataramon nin siring kaini:
◼ “Dakol na tawo an nadedesesperar sa malinaw na kadaihan nin kakayahan kan mga gobyerno sa kinaban na magtao nin praktikal na mga solusyon sa mga problema kan satong mga panahon. Sa paghona daw nindo puedeng magkaigwa nin sarong gobyerno na kayang asikasohon nin igo an gabos niatong pangangaipo? [Pasimbagon.] Aram daw nindo na igwa kita nin masasarigan na panuga manongod sa sarong gobyerno na seguradong mahale kan gabos na problema na inaatubang niato?” Maghinanyog nin maingat sa simbag kan kagharong. Depende sa sasabihon nia, magin andam na itao an saro sa nagkapirang laen-laen na presentasyon.
3 Kun an mga komento kan kagharong nagpaparisa na sia naghihingakong Kristiano, dangan puede niato siang hapoton kun sia namimibi kan “Ama Niamo.” Kun sia sumimbag nin iyo, puede niatong basahon an modelong pamibi sagkod sa kabtang na iyan nagsasabing, “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mat. 6:9, 10) Pinatutunayan kaini na sa maabot na panahon gigibohon an kabotan ni Jehova digdi sa daga. Dangan puede nang itokdo an angay na artikulo sa An Torrengbantayan o Awake! o an pahina 12 kan Ano an Kahagadan sa Sato nin Dios?
4 Kun garo baga kontento na an kagharong sa saiyang kamugtakan sa buhay, puede nindong palatawon an hapot na:
◼ “Taano ta maninigo niatong seryosong pensaron an sinasabi kan Biblia manongod sa ngapit nin gobyerno?” Dangan puede niatong gamiton an impormasyon na yaon sa librong Reasoning sa pahina 154 asin 155, na sinasambit sa halipot an saro o labi pa sa walong dahelan na itinao dian. Kun nagpapaheling nin interes an kagharong, gamiton an pulyetong An Kinaban daw na Ini Magdadanay?, poon sa enot na parapo na nasa pahina 2.
5 Dai magigin mapanggana nin biyo an enot nindong pagsongko kun dai nindo aanimaron an gana kan kagharong para sa masunod na pagdalaw. Kun siring, siertohon na magpalataw nin sarong interesanteng hapot asin manuga na sisimbagon iyan sa pagbalik liwat nindo.
6 Hale sa materyal na nasa enotan, pilion an sa pagmate nindo komportable kamong sabihon. Liwaton an mga suhestion na ini tangani na ikabagay sa saindong teritoryo. Magin pamilyar sa mga brosyur, pulyeto, asin mga artikulo sa magasin na gagamiton nindo tanganing ikaadaptar tolos nindo an saindong pakikipag-olay sa mga pangangaipo kan kagharong. Logod na andamon niato gabos nin maigot an satong mga pag-atubang “para sa kapakanan kan maogmang bareta” asin sa siring mapangganang makikabtang sa panligtas-buhay na ministeryong ini.—1 Cor. 9:23.