‘Dumiretso Kita sa Punto!’
1 Pinondo na daw nin sarong kagharong an saindong maingat an pagkaandam na pag-atubang kan mga tataramon na: “Ano an tuyo mo? Dumiretso ka sa punto!” Ano an satong manonodan sa siring na eksperyensia?
2 Mayong pasensia an dakol na tawo ngonyan. Boot nindang maaraman kun siisay kita asin kun taano ta nagduman kita sa sainda. Kun maaraman ninda na an katuyohan kan satong pagdalaw ipakipag-olay an Biblia, tibaad habo na nindang maghinanyog. An pagbasa sa Biblia asin pag-orolay sa espirituwal na mga bagay bakong importante sa buhay nin dakol. Paano niato makokombensir an siring na mga kagharong na maninigo sindang magtao nin pirang minuto na makipag-olay sa sato manongod sa sarong topiko sa Biblia?
3 Kun Ano an Pinakaepektibo: An pinakasolusyon iyo na ipaheling sa kagharong na itinatao kan Biblia an praktikal na mga solusyon sa mga problema na may labot sa saiya asin na gibohon iyan sa pinakakadikit na tataramon na mapupuede. An pinakaepektibong mga pag-atubang nagtatampok nin sarong espesipikong hapot na dinisenyo tangani na papag-isipon an kagharong, na sinusundan nin sarong teksto na minasimbag sa hapot. Tibaad ikaogma nindong probaran an nagkapira sa minasunod na mga suhestion. Iyan dinisenyo tangani na matabangan kita na tolos-tolos na ‘dumiretso sa punto’ mantang pinupukaw an interes kan kagharong.
4 Sa teritoryo na an mga tawo parateng nagsasabi na dai sinda interesado, magpalataw nin sarong hapot na kalabot sinda personalmente:
◼ “Mantang kita nagdadangadang sa masunod na milenyo, kamo daw pano nin paglaom o nagdududa? [Pasimbagon.] Patienot na sinabi kan Biblia an nakapupurisaw na mga pangyayari na naheheling niato ngonyan saka an resulta kaiyan.” Basahon an 2 Timoteo 3:1, 2, 5 asin Talinhaga 2:21, 22.
◼ “Dakula an pagmalasakit sa nasyon na ini manongod sa pag-ataman sa salud. Aram daw nindo na nanunuga an Dios na permanente niang reresolberan an gabos na problema sa salud?” Basahon an Kapahayagan 21:3, 4.
◼ “Paano sa paghona nindo makikinabang an satong komunidad kun an gabos na nag-iistar digdi nag-aaplikar kan mga prinsipyo sa Biblia?” Basahon an Mateo 22:37-39.
5 Mantang an sugo sa sato ihulit an maogmang bareta kan Kahadean, noarin man posible maninigo niatong darahon an atension sa gigibohon kan Kahadean. Puede nindong sabihon:
◼ “Aram daw nindo na ihinula kan kagurangguranging libro sa kinaban, an Biblia, na magkakaigwa nin sarong gobyerno para sa bilog na kinaban?” Basahon an Daniel 2:44.
◼ “Ano sa paghona nindo an magigin mga kamugtakan kun si Jesu-Cristo an namamahala sa daga?” Basahon an Salmo 72:7, 8.
6 Sa teritoryo na relihioso an mga tawo, puede nindong probaran an saro sa mga introduksion na ini:
◼ “Dakol an apektadong marhay nin diskriminasyon huli sa saindang relihion o kolor nin kublit. Ano sa paghona nindo an saboot nin Dios dapit sa siring na prehuwisyo?” Basahon an Gibo 10:34, 35.
◼ “Aram niato na si Jesu-Cristo naggibo nin dakol na milagro kan kaaldawan nia. Kun mahahagad nindo sa saiya na gumibo nin saro pang milagro, ano daw iyan?” Basahon an Salmo 72:12-14, 16.
Kun nagduduwaduwa an kagharong na buksan an pinto, puede nindong ponan an pakikipag-olay paagi sa pagsabi nin:
◼ “An kadaklan ngonyan sawa na sa pagdangog dapit sa mga problema. An gusto nindang madangog mga solusyon. Daing duwa-duwa na totoo man iyan sa saindo. Alagad saen kita makanonompong nin tunay na solusyon sa satong mga problema?” Pasimbagon. Basahon an 2 Timoteo 3:16, 17.
8 Taano ta Dai Iyan Probaran? Sa parate an sarong simple, diretso sa puntong hapot iyo sana an kaipuhan tangani na mapukaw an interes nin kagharong. An sarong babae na dating kontra pinadagos sa saiyang harong an duwang tugang na babae pakatapos na an saro sa sainda maghapot: “Masasabi daw nindo kun ano an Kahadean na ipinamimibi nindo sa Pamibi kan Kagurangnan?” Napukaw an interes kan babae sa hapot na iyan, asin sia nag-ako nin pag-adal sa Biblia. Sia ngonyan dusay na lingkod na ni Jehova!
9 Kun kamo nakikipag-olay sa sarong kagharong, magin sinsero sa saindong mga pananaram. Magtaram gikan sa saindong puso. Mas posibleng maghimate an mga tawo kun sinda kombensido na kita totoong interesado sa sainda.—Gibo 2:46, 47.
10 An paghuhulit kan maogmang bareta sarong angat ngonyan. May mga kagharong na suspetsoso sa mga dai kamidbid. An iba sibot-sibot sa buhay asin kakadikit kan sobrang oras. Alagad ta makaseseguro kita na dakol pa an maninigo na manonompongan. (Mat. 10:11) An satong mga paghihingoa na hanapon sinda posibleng marhay na magin orog na mapanggana kun papagdadanayon niato an satong mga pag-atubang na halipot asin ‘diretso sa punto!’