Magayagayang Dumalaw Liwat Tanganing Tabangan an mga Interesado
1 An lambang saro na nakikikabtang sa pagharongharong nagmamawot na tabangan an mga tawo na interesado. Paagi sa pagtao nin siring na tabang, nakakaeksperyensia kita nin hararom na kagayagayahan asin pagkakontento. (Ikomparar an Salmo 126:5, 6.) Ini nangangaipo na magin andam kita.
2 An pag-andam nagpopoon sa pagkakaigwa nin detalyadong impormasyon sa satong house-to-house record. Isurat an temang pinag-olayan sa enot na pagsongko asin an reaksion kan kagharong. Tibaad boot pa ngani nindong gumibo nin nota kun paano nindo gustong ponan an pag-orolay sa pagdalaw liwat nindo.
3 Halimbawa, kun sinambit nindo kan enot an pamibing Ama Niamo dangan nakapasakamot kan librong “Mabuhay Sagkod Lamang,” puwede kamong magsabi sa halipot nin arog kaini:
◼ “Kan nakaagi kong pagdalaw, pinag-olayan niato kun paano gigibohon an kabotan nin Dios digdi sa daga asin na an katoninongan magigin totoo sa gabos na kabtang nin buhay. Sa librong iwinalat ko, tabi mangnohon an sinasabi kaiyan sa pahina 156 sagkod 158 manongod sa iba pang bendisyon na dadarahon sa katawohan kan Kahadean nin Dios.”
4 Kun an saro may tendensia na dai nagtutubod sa Dios, magsabi nin arog kaini:
◼ “Kan dumalaw ako kaidto, pinag-olayan niato an punto na sinabi ni Pablo sa Hebreo 3:4, na nagtatao nin lohikong mga rason sa pagkonklusyon na siertong igwa nin intelihenteng Kaglalang nin gabos na bagay.” Basahon giraray an teksto asin buksan sa pahina 35, parapo 3 kan librong Mabuhay Sagkod Lamang. Ihapot an hapot na nasa ibaba dangan basahon an parapo, na tinotogotan an kagharong na simbagon an hapot. Imbitaran sia na kuanon an saiyang libro asin magkaibanan na pag-olayan an minasunod na pirang parapo.
5 An iyo man sanang pag-atubang na ini puwedeng gamiton sa artikulo na puwedeng napag-olayan na nindo sa An Torrengbantayan o Awake! Balikan an artikulong itinampok kan enot nindong pagdalaw dangan sambiton an saro pang interesanteng punto sa iyo man sanang artikulo o an saro na nasa ibang luwas na dara nindo. Kun posible, magkaibanan na basahon an sarong teksto asin hagadon an mga komento kan kagharong.
6 Isaisip an saindong pasohan na pagpopoon nin pag-adal sa Biblia. Sa ordinaryo iyan nagkakaipo nin nagkapirang pagsongko tanganing mapatalubo an interes sagkod dian. Ipaheling an personal nindong pagmakolog paagi sa pagdalaw liwat sa pinakamadaling panahon.
7 An maogmang bareta na ibinabalangibog niato nagpapangyari nin dakulang kagayagayahan. (Luc. 2:10) Kun an interesadong mga tawo naghihinanyog sa satong mga paghihingoa, segurado nanggad na dahelan ini nin kagayagayahan. (Fil. 4:1) Anihon niato an siring na kagayagayahan paagi sa pagdalaw liwat tanganing tabangan an mga interesado na nanonompongan niato sa langtad.