Pagtabang sa Iba na Mamidbid an Dakulang Kayamanan
1 Kun ihinuhulit niato an maogmang bareta kan Kahadean, an saro sa satong mga katuyohan iyo na tabangan an mga tawo na apresyaron an halaga kan Tataramon nin Dios. (Fil. 3:8) Igwa nin mahalagang kabtang an satong mga babasahon sa pagpalakop kan mensahe nin Kahadean. Halimbawa, an librong Mabuhay Sagkod Lamang natabangan an ginatos na ribong tawo na maglingkod ki Jehova bilang resulta kan mga katotoohan na nanodan ninda.
2 An satong ministeryo labi pa an kalabot sa pagwalat sana nin babasahon sa mga tawo. Kaipuhan niatong iintrodusir an mensahe sa nakakaakit na paagi, maghinanyog na may pakasabot sa sinasabi kan kagharong, dangan magin andam na ‘makipagrasonan sa saiya hale sa Kasuratan.’—Gibo 17:2.
3 Paano daw Ini Magigibo? An satong mga introduksion puwedeng magbukas nin dalan para sa mga kagharong na ipaheling kun baga tunay sindang interesado sa Biblia asin sa mensahe kaiyan.
Puwede kamong magsabi:
◼ “Nagsosongko kami tanganing ipakipag-olay an kahulogan kan nangyayari sa kinaban ngonyan. An kadakol na tawo nainaan na an interes sa Dios asin sa saiyang mga pamantayan sa buhay arog kan sinasabi sa Biblia. Ini nakaimpluwensiang marhay sa gawe nin mga tawo sa ibang tawo. Narisa na daw nindo ini? [Pakomentohon. Puwede kamong magsambit nin espisipikong mga pangyayari.] Mangnoha tabi an gawe kan mga sinambit sa 2 Timoteo 3:1-5, asin sabihon nindo sako kun sa paghona nindo arog kaini an kinaban ngonyan. [Basahon; pakomentohon.] Igwa daw nin marahay na dahelan na maglaom nin mas marahay na mga kamugtakan sa ngapit?” Helingon an retrato sa pahina 12 asin 13 kan librong Mabuhay Sagkod Lamang asin darahon an atension sa parapo 12 asin 13. Ialok an libro.
4 Kun sarong magurang an lumuwas sa pinto, puwede niatong ponan an satong pakipag-olay nin arog kaini:
◼ “Nakikipag-olay kami sa mga tawo na interesado kun paano mas marahay na maaatubang an mga problema sa buhay pampamilya. Pinagmamaigotan niato gabos na gibohon an pinakamakakaya niato, alagad kun igwa nin sarong bagay na makakatabang sato na magkaigwa nin mas dakulang kapangganahan, interesado kita, bako daw? [Pasimbagon.] Itinatao kan Biblia an paggiya manongod sa bagay na ini arog kan mababasa sa Colosas 3:12-14. [Basahon.] Kun siring, ano an kinakaipuhan tanganing magkamit nin mapangganang buhay pampamilya? Mangnoha an sinasabi sa publikasyon na ini sa kapitulong may titulo na ‘Ginigibong Mapanggana an Buhay Pampamilya.’” Basahon an parapo 3 sa pahina 238 kan librong Mabuhay Sagkod Lamang. Kun sibot an kagharong o dai tolos-tolos mag-ako, probaran na ialok an bagong magasin na ipinaliliwanag an mga bagay na pampamilya o an tract na Maogma sa Buhay Pampamilya.
5 Nungka niatong mamawoton na malingawan an satong katuyohan sa pagtao nin lubos na patotoo dapit sa Kahadean. (Mat. 24:14) Paagi sa marahay na paggamit kan Biblia asin kan makangangalas na kayamanan nin teokratikong mga babasahon na makukua niato, makapananarig kita ki Jehova para sa saiyang bendisyon sa pag-otob kan saiyang kabotan durante kan mahalagang mga panahon na ini.—Gal. 6:9.