An Librong Nagtatao nin Tunay na Giya
1 An kinaban dramatikong nagliwat durante kan siglong ini. Minsan ngani may mga pag-oswag sa komunikasyon, medisina, asin transportasyon, an kuwalidad nin buhay pampamilya padagos na nagrururo. Minilyon an ginigiyahan nin nagliliwat na mga pilosopiya nin mga tawo.
2 Sa nagliliwat na kinaban na ini, an banwaan ni Jehova dakula an nagin pakinabang paagi sa pagsunod sa saiyang Tataramon. An Biblia dai naliwat sa laog nin rinibong taon, asin an hatol kaiyan iyo pa man giraray an pinakapraktikal sa pagresolber sa mga problemang inaatubang niato ngonyan. Paano ta matatabangan an iba na maapresyar na iyan nagtatao nin tunay na giya para sa satong modernong aldaw?
3 Kun nakapagwalat kamo nin tract na “Why You Can Trust the Bible” sa enot na pagsongko, puwede kamong bumalik asin magsabi:
◼ “Mantang sinasabi kan Biblia na iyan mensaheng gikan sa Dios asin na saiyang iinaalok sato an buhay na daing sagkod kun mamuhay kita sono dian, sa paghona daw nindo magigin kapakipakinabang an pagsiyasat nin orog pa mapadapit kaiyan? [Pakomentohon.] Mangnoha an ihinuhula kan Biblia manongod sa kinaban na ini. [Direktang basahon an 2 Timoteo 3:1-5 sa pahina 5 kan tract.] Sa paghona daw nindo nangyayari ini sa kinaban ngonyan? [Pakomentohon.] May tamang dahelan daw na maglaom nin mas marahay na mga kamugtakan sa ngapit?” Dangan puwede nindong ipakipag-olay an ultimong duwang parapo kan tract o an pahina 161 kan librong The Bible—God’s Word or Man’s?, tanganing itampok an paglaom na iinaalok kan Biblia sa katawohan.
4 Kun an kagharong interesado sa praktikal na halaga kan Biblia asin itinokdo nindo an mga halimbawa sa kapitulo 12 kan “The Bible—God’s Word or Man’s?,” puwede nindong sabihon:
◼ “Interesado kita sa mga bagay na praktikal ngonyan, bako daw? Maoyon daw kamo na praktikal an pagtapos sa guerra? [Pakomentohon.] Kun an mga tawo makanood na iribang mamuhay sa katoninongan, marahay ining pagpopoon, bako daw? [Pasimbagon.] Iyan an eksaktong ihinula kan Biblia. [Basahon an Isaias 2:2, 3.] Napag-isip-isip na daw nindo kun paano asin kun noarin mangyayari ini?” Ipaliwanag na boot nindong ipakipag-olay pa an hapot na ini sa sunod nindong pagsongko.
5 Kun nakapagwalat kamo nin “New World Translation,” puwede nindong sabihon:
◼ “Sa pagbasa kan Biblia na ikinawalat ko saindo, puwedeng narisa nindo na ginagamit kaiyan an personal na ngaran nin Dios sa gabos na kabtang. Saro ining mahalagang pag-oswag kisa dakol na iba pang traduksion nin Biblia. Dawa ngani an ibang tawo tibaad magduwaduwang gamiton an ngaran na Jehova, dapat niatong isaisip na haloy na niang ihinayag an saiyang ngaran asin sinadol nia an saiyang mga lingkod na gamiton iyan tanganing ipamidbid sia bilang an tunay asin nabubuhay na Dios. Mangnoha an isinurat kan salmista sa Salmo 83:18.” Basahon an teksto, asin pakomentohon an kagharong. Sono sa ipinaheling na interes, puwede nindong gamiton an dugang pang impormasyon na yaon sa irarom kan temang “Jehovah,” poon sa pahina 191 kan librong Reasoning.
6 Solamente an Biblia an nagtatao kan giyang kaipuhan nin tawo. (Jer. 10:23) Kun siring, odok niatong imbitaran an iba na makinabang sa madonong na hatol asin praktikal na sadol kaiyan.