An Halaga kan Biblia sa Presenteng Kinaban
1 An dakol ngonyan minamansay an Biblia na bako nang uso asin bakong realistiko. Minsan ngani iyan an librong pinakamahiwas na idinidistribuwir sa bilog na kasaysayan, pipira an binabasa iyan asin mas kakadikit an sinusunod pa an paggiya kaiyan.
2 Al kontraryo, pinahahalagahan niato an Biblia bilang Tataramon nin Dios. An mga katunayan nagpapaheling na eksakto an kasaysayan kaiyan. Dugang pa, an pambihirang pagkakaoroyon kaiyan, an mga hula kaiyan, asin an pagigin makosog na puwersa kaiyan na nakamomotibar sa buhay nin mga tawo gabos nagpapaheling na an Biblia “ipinasabong nin Dios.” (2 Tim. 3:16) An satong pag-apresyar kaiyan maninigong magpahiro sato sa pagdagka sa iba na siyasaton an tunay na halaga kaiyan.
3 An sarong pagdolok puwedeng arog kaini:
◼ “Huli sa masakit na mga problemang napapaatubang sa katawohan, dakol na tawo an nadedepisilan na maniwala sa Dios, o pinagdududahan ninda an kakayahan nin Dios sa pagresolber sa mga problemang inaatubang niato. Ano an saboot nindo dapit kaiyan? [Pasimbagon.] Mangnoha an titulo kaining tract, Why You Can Trust the Bible.” Basahon an primero asin ikaduwang parapo sa pahina 2. Kun an kagharong nagpapaheling nin interes, puwede nindong basahon asin ipaliwanag an mga tekstong sinitar sa ikaduwang parapo. Dangan puwede nindong ialok an librong The Bible—God’s Word or Man’s? kaiba an New World Translation, na ipinaheheling kun paano pinaririgon kaiyan an pagtitiwala sa Tataramon nin Dios.
4 An saro pang pagdolok puwedeng kaagid kaini:
◼ “Dai daw kamo maoyon na an katawohan nangangaipo nin paggiya sa pag-atubang sa mga problema sa buhay? [Pasimbagon.] Kan nakaagi, an mga tawo parateng nagsasarig sa Biblia para sa paggiya, pero naliwat na an mga panahon. Sa paghona daw nindo an Biblia may praktikal pang halaga ngonyan? [Pasimbagon.] Mangnoha an sinasabi sa 2 Timoteo 3:16. [Basahon.] An nasusurat na Tataramon nin Dios bako sanang nagtatabang sato sa paggibo nin madonong na mga desisyon kundi nagtatao man nin masasarigan na paglaom para sa ngapit.” Basahon an Juan 17:3. Kun marahay an reaksion kan kagharong, ipaheling an saro o duwang espisipikong punto na napili nindo sa Kapitulo 12 kan librong The Bible—God’s Word or Man’s? tanganing iilustrar an praktikal na halaga kan Biblia.
5 Tibaad marisa nindong nakatatabang an paggamit sa nagkapirang introduksion na nalilista sa pahina 10 kan librong Reasoning sa irarom kan subtemang “Bible/God.” An dugang pang impormasyon itinatao sa pahina 58-68 na puwedeng makatabang sa pagsimbag sa mga hapot kan mga kagharong o sa pag-atubang sa saindang mga pagkontra.
6 Pag-alok kan New World Translation: Puwede nindong ihapot kun may kopya nin Biblia an kagharong asin kun napapasilan sia sa pagbasa dian. Depende sa simbag, sambiton an nagkapira sa mahalagang mga kabtang kan New World Translation. Puwede nindong itampok an saro o duwang punto sa pahina 276-80 kan librong Reasoning.
7 Magin alisto sa pagdagka sa mga tawo na basahon an Biblia. Paagi sa pag-aplikar kan mga prinsipyo kaiyan sa saindang personal na buhay, kakamtan ninda an dakol na pakinabang ngonyan asin sa ngapit.—Sal. 119:105.