“Magin Andam Para sa Gabos na Marahay na Gibo”
1 Kan ponan ni Jesus an sarong bagong kampanya nin paghuhulit, sia nagtao nin panahon tanganing andamon an saiyang mga disipulo. (Mat. 10:5-14) Minsan ngani kita gabos sibot, an paggamit niato nin dawa pira sanang minuto sa pag-andam bago makikabtang sa pagharongharong makakatabang sa sato na mag-ani nin marahayon na mga resulta.—2 Cor. 9:6.
2 Kun Paano Maandam: An marahay na pag-andam minapoon sa pagigin pamilyar sa babasahon na pinaplano niatong ialok. Maninigo man niatong isipon an kamugtakan kan mga tawo sa satong teritoryo. Anong mga problema an ikinakahadit ninda? Anong relihiosong mga paniniwala an posibleng masumpongan niato? Puede niatong konsultahon an sampol na mga presentasyon sa An Satong Ministeryo sa Kahadean asin sa Reasoning From the Scriptures tanganing magkaigwa kita nin mga ideya.
3 Makakatabang man sa sato an maingat na paghinanyog sa mga demonstrasyon na ipinapaheling sa Pagtiripon sa Paglilingkod. Mantang nagigin eksperyensiado kita sa paggamit kan satong presentasyon, mas kadikit na panahon an kakaipuhanon niato sa pag-andam. Minsan siring, bago an kada pagpasiring niato sa ministeryo, kun iniisip niato kun ano an satong sasabihon asin padagos na papakarhayon an satong presentasyon, magigin mas epektibo kita. Maninigo man niatong siertohon na yaon sa satong bag an mga kaipuhan niato sa paghuhulit.
4 Ano an makakatabang sa sato na magirumdoman an satong presentasyon? An pagpraktis nin makosog sarong paagi na ikatadom sa satong isip an gusto niatong sabihon. Ikinakaogma nin nagkapira na magkaigwa nin mga sesyon sa pag-ensayo durante kan saindang pampamilyang pag-adal. Nakakatabang para sa iba an pagsurat nin halipot na sumaryo kan saindang presentasyon sa sadit na kard asin an pagheling dian nin madali bago sinda magdolok sa pinto.
5 Kun Taano ta Kapakipakinabang: An pagigin andam na marhay nakakadagdag sa satong pagkaepektibo asin kagayagayahan sa ministeryo. Iyan nakakatabang sa sato na magin relaks asin daing gayo ninenerbios sa pakikipag-olay. Makakatao kita nin orog na atension sa kagharong imbes na pagparaisipon na sana kun ano an sasabihon niato. Dugang pa, an pagigin pamilyar sa babasahon makakatabang sa sato na magin mas entusiastiko kun nag-aalok kaiyan.
6 Sinasadol kita kan Kasuratan na “magin andam para sa gabos na marahay na gibo.” (Tito 3:1) Igwa pa daw nin mas marahay na gibohon kisa sa paghuhulit kan maogmang bareta? Paagi sa pagigin andam na marhay, ipinapaheling niato an paggalang sa kagharong na naghihinanyog, asin ki Jehova, an Dios na irinerepresentar niato.—Isa. 43:10.