Pag-aatubang kan Maogmang Bareta—Na May Kagayagayahan
1 Si Jesu-Cristo nakanompong nin kayagayahan sa saiyang ministeryo. (Juan 4:34) Siring man, si Pablo nakamate nin kagayagayahan sa saiyang gibohon. Ano an sekreto kan saindang pagkaigwa nin kagayagayahan sa ministeryo sa ibong nin dakol na kasakitan asin paglamag? An saindang paglilingkod ki Jehova bilog na kalag. Naghigos sinda sa saindang asignasyon na itinao nin Dios, asin an ibinunga kagayagayahan huli sa saindang mga pagpapagal. (Juan 13:17; Kap. 14:13) Paano nindo madudugangan an saindong kagayagayahan sa ministeryo mantang kamo naglilingkod ki Jehova?
ISIPON AN PAGTABANG SA MGA TAWO
2 Si Jesu-Cristo asin Pablo ekselenteng mga paratokdo. An katuyohan ninda taruson an puso kan mga naghihinanyog. An dakol dai nagkuyog, pero an mga iyo tunay na dahelan nin kagayagayahan. (Fil. 4:1; ikomparar an Lucas 15:7) Iyo, an pagtabang sa mga tawo na makanood manongod ki Jehova asin maheling sinda na manindogan para sa katotoohan nagpapaogma sa sato.
3 Puwede man nindong manamitan an kagayagayahan na ini paagi sa ekspertong paghiras sa iba kan saindong aram. An organisasyon ni Jehova nagtagama nin ekselenteng mga instrumento sa pagtabang sato sa pagtotokdo niato sa iba. Kun kamo nag-aandam para sa ministeryo, isipon kun paano nindo magagamit an mga suhestion sa An Satong Ministeryo sa Kahadean asin librong Reasoning sa pagtabang sa mga nag-iistar sa saindong lugar. Maghingoa na tabangan an mga tawo na makaduman sa dalan na pasiring sa kaligtasan paagi sa pagigin andam nanggad na ponan an marahay na pakipag-olay sa sainda. An siring tibaad gumiya pasiring sa mabungang mga pag-adal sa Biblia asin orog na kagayagayahan sa satong paglilingkod.—Sant. 1:25.
SARONG POSITIBONG KAISIPAN
4 Baga man kamo naglilingkod bilang parahayag o payunir, girumdomon an katuyohan kan ministeryo. (Mat. 24:14; 28:19, 20) An paghuhulit kan maogmang bareta para sa pagpatotoo asignasyon nin Dios. Iyan pribilehiyo, asin maninigo niatong saboton na an hinahagad ni Jehova sa saiyang mga lingkod bakong magabat. (1 Juan 5:3) Boot nia na an saiyang banwaan maogma sa paglilingkod sa saiya. Kaya, minsan an iba tibaad dai maghinanyog sa paghuhulit, puwede pa man giraray kamong magkaigwa nin dakulang kagayagayahan sa ministeryo. Taano daw?
5 An bagay na kamo nag-ootob kan kabotan nin Dios maninigong magtao saindo nin dakulang kagayagayahan ta “an saindong pagpapagal bakong daing kapakanan dian sa Kagurangnan.” (1 Cor. 15:58) Si Jehova “bakong biko na malingawan an saindong ginibo asin an pagkamoot na saindong ipinaheling para sa saiyang ngaran.” (Heb. 6:10) An paglilingkod ki Jehova nin bilog na kalag ginigikanan nin kagayagayahan.—Sal. 40:8.
6 An sarong Kristiano maninigong maggayagaya sa saiyang paglilingkod sa Dios. Magpadagos na makanompong nin kagayagayahan sa ministeryo, na nakaseseguro na inaapresyar ni Jehova minsan an kasaditsaditing akto nin tunay na debosyon. (Ikomparar an Marcos 12:41-44.) Kita logod gabos magpadagos na ‘pamurawayon an satong ministeryo’ asin kamtan an kagayagayahan na dara kaiyan.—Roma 11:13.