Dugangan an Saindong Kagayagayahan sa Paghuhulit
1 An kagayagayahan nin paghiras kan maogmang bareta sa iba—naeeksperyensiahan daw nindo iyan sa saindong ministeryo? Kun kita bakong maingat, an maraot na kinaban sa palibot niato puede kitang gibohon na masusupgon sa paghuhulit, na magin dahelan na mawaran kita nin kagayagayahan. An paghuhulit sa dai naghihimateng teritoryo puede man na paluyahon an satong boot. Anong praktikal na mga paagi an magigibo niato tanganing dugangan an satong kagayagayahan sa paghuhulit?
2 Magin Positibo: Talagang nakakatabang an pagpapadanay nin positibong aktitud. An sarong paagi tanganing magibo iyan iyo an paghorophorop kan satong dakulang pribilehio nin pagigin “mga kapwa trabahador nin Dios.” (1 Cor. 3:9) Si Jesus kaiba man niato sa paghaman kan gibohon na ini. (Mat. 28:20) Asin sinusuportaran nia kita paagi sa sarong hukbo nin mga anghel. (Mat. 13:41, 49) Kun siring, makasisierto kita na an satong mga paghihingoa ginigiyahan nin Dios. (Kap. 14:6, 7) Kaya ano man an magin pag-ako nin iba sa satong gibohon, an reaksion sa langit sarong dakulang kagayagayahan!
3 Mag-andam na Marhay: An marahay na pag-andam nakadudugang man sa satong kagayagayahan. Dai kaipuhan an dakulang trabaho sa pag-andam para sa ministeryo. Pirang minuto sana an kaipuhan tanganing estudyaran an sarong puntong mapag-oolayan sa bagong mga magasin o sa alok na literatura kan bulan. Pumili nin sarong pag-atubang hale sa “Kun Ano an Sasabihon Manongod sa mga Magasin,” sa An Satong Ministeryo sa Kahadean, o helingon an librong Reasoning para sa sarong epektibong introduksion. Kun kamo naolang nin sarong pagsayuma na komun na pinalalataw nin mga kagharong, mag-andam nin simbag na pinasasalamatan an saindang komento asin magiya kan atension sa sarong tema na nakapupukaw nin interes. An librong Reasoning sarong dakulaon na tabang sa paggibo kaini. An paggamit kan mga pantabang na ini matao sa sato nin kompiansa na kaipuhan niato tanganing maghulit na may kagayagayahan.
4 Maigot na Mamibi: Mahalagang marhay an pamibi sa pagkaigwa nin nagdadanay na kagayagayahan. Mantang kita naggigibo kan gibohon ni Jehova, kaipuhan niatong makimaherak sa saiya para sa saiyang banal na espiritu, na an sarong bunga kaiyan iyo an kagayagayahan. (Gal. 5:22) Tatawan kita ni Jehova nin kosog tanganing padagos na makapaghulit. (Fil. 4:13) An pamimibi manongod sa satong ministeryo makakatabang sa sato na papagdanayon an tamang punto de vista sa mga bagay-bagay kun kita nagkakaigwa nin dai nakaoogmang mga eksperyensia. (Gibo 13:52; 1 Ped. 4:13, 14) Kun kita natatakot, an pamibi makakatabang sa sato tanganing makapadagos na may kapusoan asin masinggaya.—Gibo 4:31.
5 Magmukna nin mga Oportunidad: Siempre, mas magayagaya an satong ministeryo kun may nanonompongan kitang mga tawo asin napatototoohan ta sinda. An pagliwat kan satong iskedyul sa pagharongharong sa ibang oras, tibaad pabanggi na o amay sa banggi, puedeng magbunga nin orog na kapangganahan. May nanunuparan kamong mga tawo sa kada kamo maglakaw sa tinampo, mamakal, maglunad sa auto, o maglakawlakaw sa parke. Taano ta dai mag-andam nin sarong halipot na pambukas nin orolay asin mangenot sa pagdolok sa mga garo baga makikatood? O tibaad kamo may sekular na trabaho o nagduduman sa pampublikong eskuelahan, na dian may iba kamong nakakaolay aroaldaw. Tibaad magkaigwa kamo nin oportunidad na magpatotoo paagi sana sa pagpalataw nin tema sono sa Kasuratan na nakapupukaw nin interes. An arin man sa mga paghihingoang ini puedeng makadugang nin dakula sa rarom nin kagayagayahan sa paghuhulit.
6 Mantang an kagayagayahan nakatatabang sa sato na makatagal, mahalagang marhay nanggad na papagdanayon iyan! Paagi sa paggibo kaiyan, maani kita nin dakulang balos kun matapos na an dai na maootrong gibohon na ini. An oportunidad na iyan mismo puedeng dugangan an satong kagayagayahan sa paghuhulit.—Mat. 25:21.