Patienot na Pagplano Para sa Disyembre
1 Bago aktuwal na pumoon tanganing maotob an sarong pasohan, kaipuhan kitang magplano. Halimbawa, tibaad boot niatong magbakasyon na may kaibang pag-atender sa kombension. Tibaad kalabot dian an patienot na pagplano para sa pagtipon nin kuwarta, pagkua nin mga dadagusan, asin iba pa. An gabos na planong ini kaipuhan tangani na maotob niato an satong pasohan.—Tal. 21:5.
2 Sa siring man na paagi, kaipuhan an pagplano tangani kitang magin mapanggana sa pakikikabtang sa pag-auxiliary payunir. An manampulong ribo sa satong mga tugang na lalaki asin babae sa bilog na kinaban regular na naggigibo kan paaging ini nin paglilingkod asin nag-aani nin dakol na personal na pakinabang. An minasunod na suhestion tibaad makatabang saindo sa pagplano na makikabtang sa pag-auxiliary payunir, tibaad sa sunod nang bulan.
3 Pumili nin kombenyenteng panahon na ikaaareglo nindo na magkaigwa kan pinakadakol na oras na magagamit sa paglilingkod sa langtad tanganing maabot an pasohan na 60 oras. Tibaad kaiba digdi an paggamit kan bakasyon nindo. An mga aking nag-eeskuwela puwedeng gamiton an bakasyon sa pag-auxiliary payunir.
4 An mga bulan na may limang Sabado asin Domingo parateng nagtatao nin mas dakol na oras sa ministeryo sa langtad. Mangnoha na an Disyembre ngonyan may limang Sabado asin Domingo. Kaolayon an iba na tibaad puwedeng makaiba sa saindo magsalang bilang payunir o parahayag.—Tal. 20:18.
5 Gumibo nin praktikal na iskedyul tanganing magamit an saindong oras sa pinakamadonong na paagi. Magplano na gamiton an dakulang kabtang kan saindong oras sa pagharongharong. Konsideraron an paghuhulit sa banggi sa lugar na ini posible, asin makikooperar sa mga areglo kan kongregasyon sa paglilingkod sa langtad sa laog kan semana asin sa Sabado saka Domingo. An pagsuportar asin pag-iba sa mga tugang na lalaki asin babae puwedeng makapakosog sa lambang saro. Padagos na idolok an bagay na iyan ki Jehova sa pamibi. (Col. 4:2) Hagadon an saiyang paggiya mantang kamo nagpaplano na makikabtang sa pag-auxiliary payunir.
6 Dakol an enot na nakanamit kan bilog na panahon na paglilingkod bilang auxiliary payunir, asin ini nagpahiro sainda na magin regular payunir. An kada aldaw orog kitang irinarani sa kaotoban kan makangangalas na mga panuga ni Jehova. Iyan kanigoan na bendisyon para sa mga nakahihimong makanamit nin sarong klase nin bilog na panahon na paglilingkod! Magplano patienot pa, asin bendisyonan logod ni Jehova an saindong mga paghihingoa.