Dai Paglingawan an mga Inaktibo
1. Taano ta maninigo kitang maghingoa na parigonon an boot kan mga nagin inaktibo?
1 May midbid daw kamo na nagin inaktibo? Tibaad nagpondo na sia sa pakikiasosyar sa kongregasyon asin naparayo na. Tibaad nakaolay na nindo an tawong iyan mientras na nasa ministeryo sa harong-harong. Dapat na girumdomon niato na an indibiduwal na iyan tugang ta pa man giraray sa espirituwal. Boot niatong patunayan an satong pagkamoot sa saiya asin tabangan sia na bumalik sa kongregasyon patin sa ‘pastor asin paraataman kan satong kalag.’—1 Ped. 2:25.
2. Paano kita makakatao nin pagparigon sa boot sa sarong inaktibo?
2 Magpaheling nin Interes: An halipot na pag-apod sa telepono o pagdalaw puedeng mag-asegurar sa saro na nagin inaktibo na dai niato sia nalilingawan. Ano an puede niatong sabihon? Puede kitang makaparigon sa boot dawa sa paagi na ipinapaaram sa tawong iyan na iniisip niato sia. Papagdanayon na positibo asin nakakaparigon an pag-oolay. (Fil. 4:8) Puede niatong sambiton an sarong punto na ikinaogma niato sa nakaagi pa sanang pagtiripon. Puede man niato siang imbitaran sa nagdadangadang na pagtiripon o asamblea asin sabihon sa saiya na irereserba nindo sia nin tukawan o maareglo kamo nin transportasyon para sa saiya.
3. Paano nareaktibar an sarong tugang na babae?
3 An sarong tugang na babae na nagin inaktibo sa laog nin labing 20 taon nanompongan sa teritoryo. Minsan ngani habo niang umako nin pag-adal sa Biblia, an tugang na babae na nakanompong sa saiya nagdalaw liwat, na nagwalat nin bagong mga magasin. Pakatapos kan pandistritong kombension, isinaysay kan parahayag sa inaktibong tugang an nagkapirang tampok na kabtang kan kombension, asin pag-abot nin panahon nareaktibar ini.
4. Paano niato maninigong trataron an saro na nakikiasosyar na giraray paagi sa pag-atender sa mga pagtiripon?
4 Kun Bumalik an Saro: Kun an sarong tugang na inaktibo pumoon na giraray na umatender sa mga pagtiripon, paano niato sia maninigong trataron? Bueno, paano trinatar ni Jesus an saiyang mga disipulo pakatapos na sia temporaryong bayaan ninda? May init na inapod nia sinda na saiyang “mga tugang” asin nagpaheling sia nin kompiansa sa sainda. Tinawan pa ngani nia sinda nin importanteng asignasyon. (Mat. 28:10, 18, 19) Dai nahaloy pakatapos kaiyan, sinda nagin sibot sa pagpahayag kan maogmang bareta na “dai nin ontok.”—Gibo 5:42.
5. Sabihon an mga situwasyon na maninigo niatong kaolayon an kamagurangan manongod sa saro na inaktibo.
5 Bago alokan na adalan sa Biblia an saro na nagin inaktibo o bago imbitaran na umiba sa sato sa ministeryo an sarong tugang na nagin inaktibo sa haloy na panahon, maninigo kitang humagad nin instruksion sa kamagurangan. Kun makanompong kita sa teritoryo nin inaktibong parahayag, maninigo niatong impormaran an kamagurangan tanganing makatao sinda nin kinakaipuhan na tabang.
6. Anong kagayagayahan an puede niatong maeksperyensiahan sa pagtabang sa mga inaktibo?
6 Siring sa malinaw na ipinapaheling kan Biblia, an mga nakatagal sana sagkod sa katapusan an maako nin kaligtasan. (Mat. 24:13) Kun siring, tawan nin atension an mga tibaad nasingkog o naparayo na. Kun mapasensia niatong ipinapabanaag an pagkamoot ni Jehova paagi sa pagpaheling nin sinserong interes sa mga siring, puede kitang makaeksperyensia kan kagayagayahan na maheling sinda na pumoon giraray sa saindang sagradong paglilingkod kaiba niato.—Luc. 15:4-10.