Positibong Paghiro Pasiring sa Orog Pang Pag-oswag

¹ Sa madalion na maaaraman niato an pankinaban na report para sa 1992 na taon nin paglilingkod. Sierto na iyan matao liwat nin malinaw na ebidensia na binibendisyonan ni Jehova nin pambihirang mga pag-oswag an saiyang banwaan. Padagos an pangagda na umiba sa satong mahiwas na internasyonal na kasararoan nin magturugang. Ipinaheheling nin mga bilang nin nag-atender sa Memorial na minilyon an naghihinanyog sa mensahe kan Kahadean. Hale sa gabos na nasyon, nagkukuyog sinda sa ipinasabong na pangagda na nagkukurahaw nin: “Madia kamo, banwaan, asin magtukad kita sa bukid ni Jehova, sa harong kan Dios ni Jacob; asin totokdoan nia kita dapit sa saiyang mga dalan, asin kita maglalakaw sa saiyang mga dana.”​—Isaias 2:​2-4 asin Miqueas 4:​1-4.

² Magin Determinadong Umoswag: Naghihiro an organisasyon ni Jehova. Mantang kadakol na bagohan an nagtutukad sa bukid kan tunay na pagsamba ki Jehova, mahalaga na an kada saro padagos na orog pang umoswag sa espirituwal dangan tabangan an mga bagohan na iyan man an gibohon. An pangangaipo kan siring na pag-oswag ipinaririsa kan mga tataramon na an mga naghihinanyog sa pangagda na tumukad sa bukid ni Jehova magsabi man sa iba nin, “Madia.” May ibinareta man si apostol Juan na kaagid kaiyan sa Kapahayagan 22:17: “Asin an espiritu asin an nobya padagos na nagsasabi: ‘Madia!’ Asin an siisay man na makadangog magsabi: ‘Madia!’”

³ Ipinaheling ni Jesus kun paano itatao an pangagdang ini. Kan an mga tawo maghinanyog sa saiyang pagtotokdo, inagda nia sindang makikabtang sa saiyang ministeryo asin tinokdoan sinda kun paano gigibohon iyan. (Mat. 4:19; 10:​5-7, 11-14) An saiyang mga disipulo nakanood kan epektibong mga paaging ginagamit nia paagi sa pag-ibaiba sa saiya asin pagmamasid kun paano nia ginigibo an mga bagay. Dangan isinunod ninda an saindang ministeryo sa saiya. Nanodan na marhay ninda an saiyang mga paagi kaya pati an mga nagtutumang nakamidbid nin malinaw na sinda mga disipulo ni Jesus. An Gibo 4:13 nagbabareta: “Ngonyan kan maheling ninda an daing pag-alangan na pagtaram ni Pedro asin Juan, . . . namidbid ninda na sinda dating mga kaiba ni Jesus.”

⁴ Bago nagbuwelta sa langit, ipinagboot ni Jesus na an saiyang mga disipulo maninigong gumibo nin bagong mga disipulo, na tokdoan sinda kun paano sinda mismo tinokdoan. Sa Mateo 28:​19, 20, ipinagboot ni Jesus: “Kaya paduman kamo asin gumibo kamo nin mga disipulo sa mga tawo kan gabos na nasyon, . . . na tokdoan nindo sinda na otobon an gabos na bagay na ipinagboot ko sa saindo.” Asin sa pagparisa na ini magpapadagos sagkod sa satong kaaldawan, idinugang nia: “Uya! ako danay na nasa saindo sagkod sa pagtatapos kan palakaw nin mga bagay.”

⁵ An tunay na mga disipulo ni Jesu-Cristo dai nagkulang sa pagkuyog sa saiyang mga instruksion na itokdo sa bagong mga disipulo an gabos niang ipinagboot. Minsan siring, an pambihirang pagdakol kan mga Saksi ni Jehova naghahagad na konsideraron niato an espesyal na mga pangangaipo kan mga bagong mabautismohan na miembro kan kongregasyon asin dai pa bautisadong mga parahayag saka kan mga nakikipag-adal sato sa Biblia asin tibaad nagpopoon nang umatender sa mga pagtiripon kan kongregasyon.

⁶ Sa kapinonan kan 1992 na taon nin paglilingkod, mga 1 sa kada 9 na parahayag an saro pa sanang taon na aktibo sa ministeryo. Dugang pa, 1 sa kada 6 an tolong taon pa sanang naghuhulit o mayo pa; asin 1 sa kada 4 an dai pa malabi sa limang taon na nakikakabtang sa ministeryo. Minsan ngani an dakol na bagohan marahay an pag-oswag poon na magin miembro kan kongregasyon, sierto na an dugang na tabang sa nagkapirang bagay makatatabang na maparikas an saindang espirituwal na pag-oswag.

⁷ An Hebreo 6:1 nagsasadol sa gabos na “magpadagos . . . sa pagkamaygurang.” An Kristianong pagkamaygurang labi nanggad sa pagsumitir sana nin report sa paglilingkod. Kabale dian an pag-oswag sa personal na pag-adal asin regular na pag-atender sa pagtiripon saka mahigos na pakikakabtang sa ministeryo sa langtad. Kabale man an pagtabang sa iba na magkaigwa nin kaaraman sa katotoohan para sa kaligtasan. Kaipuhan na pagmaigotan niatong pakarhayon an satong abilidad sa ‘pakipagrasonan hale sa Kasuratan.’ (Gibo 17:2) An pagtalubo pasiring sa pagkamaygurang nagkakaipo nin panahon, asin iyan depende sa satong diosnon na debosyon asin sa pagkakaeksperyensia niato sa langtad. Minsan ngani kita an bahala sa rarom kan satong diosnon na debosyon, madonong na togotan an ibang maygurang na tugang na lalaki asin babae na tabangan kitang magkaigwa nin praktikal na eksperyensia. Makanonood kita sa saindang eksperyensia, nangorogna sa ministeryo sa langtad. Dai kaipuhan na magsadiri kitang manodan an gabos paagi sa pagpatibasang.

⁸ Tabang Para sa mga Kulang nin Eksperyensia: An arogan sa pagtao nin tabang inestablisar sa kapinonan kan Kristianong kongregasyon. Tinokdoan ni Jesus an saiyang mga disipulo. (Mar. 3:14; Luc. 9:1; 10:1) Sinda nagtokdo man sa iba. Si Timoteo nag-ako nin espesyal na pagpakosog asin tabang ki apostol Pablo, asin an disipulong si Apolos nag-oswag sa personal na tabang ni Aquila asin Priscila. (Gibo 18:​24-27; 1 Cor. 4:17) An maygurang na mga miembro kan Kristianong kongregasyon inaarog ngonyan an mga halimbawang idto, na tinotokdoan asin pinakokosog an mga kulang pa nin eksperyensia, nangorogna an mga bagohan asin hobenes. Arog kan sabi kan Roma 15:​1, 2, “Kaya, kitang mga makosog maninigong magpasan kan mga kaluyahan kaidtong mga bakong makosog.”

⁹ An mga magurang may paninimbagan na tabangan an saindang mga aki na umoswag sa espirituwal. Kabale digdi an pampamilyang pag-adal, pagtotokdo sa mga aki kun paano personal na mag-aadal, regular na pag-atender sa mga pagtiripon asin pakikakabtang, asin pag-aplikar kan saindang nanonodan. (Efe. 6:4; 1 Tim. 5:8) An mga nangengenot sa Pag-adal sa Libro kan Kongregasyon nangorognang maninigong gumibo nin mga areglo na tabangan an gabos na yaon sa saindang grupo sa pag-adal sa libro na umoswag sa espirituwal na paagi. Makatatabang man an paraataman sa paglilingkod asin an iba pang magurang saka an ministeryal na mga lingkod asin iba pang miembro kan kongregasyon.

¹⁰ Itao an Kaipuhan: An pangangaipo tibaad tabang sa saro sanang kabtang kan Kristianong aktibidad, arog baga kan personal na pag-adal. An saro tibaad nagkakaipo nin mga suhestion sa pag-establisar nin praktikal na iskedyul sa pag-adal. An iba pa tibaad kaipuhan an tabang sa pag-andam nin mga komento o asignasyon. An iba tibaad kaipuhan na makanood kun paano sisiyasaton an mga tema sa Biblia.

¹¹ An dakol na bagohan nagkakaipo nin tabang sa ministeryo sa langtad. An sarong parahayag tibaad boot na magin orog na epektibo sa pagharongharong, pagdalaw liwat, o pagpopoon asin pangengenot sa pag-adal sa Biblia. Tibaad igo na an pirang pagpraktis na ginagamit an mga introduksion asin pag-aatubang sa librong Reasoning o sa An Satong Ministeryo sa Kahadean. Sa ibang panahon, tibaad an kaipuhan sana mga suhestion para sa praktikal na iskedyul sa paglilingkod sa langtad. An paggibo nin depinidong mga areglo na ibanan an saro na nagkakaipo nin tabang magpapangyari saiya na umoswag sa espisipikong mga pasohan.

¹² Sinasadol kita kan Tataramon nin Dios na ipaheling sa iba an satong espirituwal na pag-oswag. (1 Tim. 4:15) Kaoyon sa pagpakosog na iyan, idinoon kan apostol an pangangaipo na sanayon an satong sadiri na garo para sa paglaban sa paorumbasan sa karawat o sa panggana sa espirituwal na pakikilaban. (1 Cor. 9:​24-27; 2 Cor. 10:​5, 6) Maninigo na kita listong iaplikar an gabos na nanonodan niato manongod sa kabotan nin Dios tanganing maheling sato nin mga nagmamasid an buhay na mga halimbawa kan tunay na Kristianong pagtubod. Siring man, maninigo kitang umoswag sa abilidad sa pagtotokdo sa iba na magin nagdusay na mga disipulo ni Jesu-Cristo.​—Sant. 1:​22-25; 1 Tim. 4:​12-16.

¹³ Kaiba sa Pag-oswag an Pagtagal sa mga Pagbalo: Minsan si Jesu-Cristo nakanood nin mahahalagang leksion sa mga bagay na saiyang tinios. (Heb. 5:8) Iyo man kita. Kaya, naorog an espirituwal na pag-oswag kun nagkakaigwa kita kan positibong kaisipan na irinirekomendar sa Santiago 1:​2, 3: “Ibilang nindong bilog na kagayagayahan, mga tugang, kun kamo napaaatubang sa manlaenlaen na pagbalo, sa pakaaram na ining nabalong kuwalidad kan saindong pagtubod nagbubunga nin pakatagal.” Kaya, baga man an kaipuhan na atubangon niato mga helang na dai nahahale, mga kasakitan sa pagbuhay, pag-istar sa nababangang harong, pagtumang sa teritoryo, o iba pang masakit na mga kamugtakan, igwa kita kan garantiya ni Jehova na sa tabang nia kita makapanggagana asin makapagpapadagos na umoswag sa satong pagsamba sa saiya. (1 Cor. 10:13; 2 Cor. 12:9; 1 Ped. 5:​8-11) Naaabot an kapangganahan paagi sa karigonan sa irarom nin gabos na kamugtakan, na ‘nagtataram kan banal na mga kapahayagan nin Dios asin naglilingkod na nagsasarig sa kakosogan na itinatao nin Dios, tanganing sa gabos na bagay an Dios mapamuraway paagi ki Jesu-Cristo.’​—1 Ped. 4:11.

¹⁴ Akoon an Tabang Para sa Orog Pang Pag-oswag: Kun saro kamo na nagkakaipo nin tabang tanganing orog pang umoswag sa espirituwal, magin andam na umako nin tabang sa mas eksperyensiadong miembro kan kongregasyon. Dawa kun dai kamo inoopresiran nin tabang, dai masopog na humagad nin tabang. Dai mag-alangan na patabang sa siisay man sa mga eksperyensiado sa kongregasyon. O puwede kamong humagad nin kinakaipuhan na tabang sa nangengenot sa saindong Pag-adal sa Libro kan Kongregasyon, paraataman sa paglilingkod, o sa siisay man sa iba pang magurang.​—Ikomparar an Genesis 32:26; Mateo 7:​7, 8.

¹⁵ Tunay na sarong makangangalas na pribilehiyo na mapabilang sa padagos an pagdakol na internasyonal na “dakulang kadaklan” na nagtutukad sa bukid nin malinig na pagsamba ki Jehova. (Kap. 7:9) Saro man na pribilehiyo na agdahon an iba na umiba sa sato. May odok sa pusong pag-apresyar, magpadagos logod kitang gumibo nin positibong paghiro pasiring sa orog pang pag-oswag, na pinaririgon an satong espirituwalidad asin ginigibo an makakaya niato na matabangan an iba na umoswag kaiba niato sa paglilingkod ki Jehova.