Pag-oswag sa Ministeryo
1 May suanoy nang sarabihon manongod sa pag-oswag na nagsasabi: “Pumoon ka sa namumugtakan mo. Pero dai ka magdanay sa namumugtakan mo.” Tamang-tama an sarabihon na iyan sa pag-oswag sa ministeryo! Kan kamo pumoon sa ministeryo, tibaad an kaya sana nindo halipot na pag-aatubang kan mensahe kan Kahadean. Pero kun nakaagi na an pirang taon asin dai pa kamo nakakahiro sa puntong iyan, na nagdanay kamo sa namumugtakan nindo, ano daw an magigibo nindo?
2 An enot na tangga arangon ki Jehova an kadonongan na kaipuhan sa pagtokdo na may kakayahan. (Tal. 15:14; Sant. 1:5) An ikaduwang tangga maghingoa oyon sa saindong pamibi. Magtagama nin kadikit na oras sa pagrepaso sa mga pag-aatubang sa librong Reasoning. Humanap nin saro na sa paghona nindo magagamit nindo nin epektibo, asin paorootrong repasohon an pag-aatubang sagkod na iyan klaro na sa saindong isip. An ikatolong tangga umiba sa saindong mga tugang sa langtad tanganing magibo nindo an pag-aatubang na inandam nindo.
MGA KATOOD NA MAKATATABANG SAINDO
3 Tibaad sinasabi nindo, ‘Mas pasil iyan na sabihon kisa gibohon.’ Totoo, alagad ta iyan an dahelan kun taano ta kamo may mga katood na makatatabang saindo. Kun kamo hoben pa, kaolayon an saindong mga magurang o an eksperyensiadong mga parahayag na mabungang mga ministro. Humagad sainda nin suhestion sa kun paano kakaolayon an mga tawo sa harong. Tibaad isuherir ninda an mga pagpraktis na dian mapoprobaran nindo an saindong pag-aatubang. Puwede sindang magsagin kagharong, na pinalalataw an usong mga pagtumang na nanonompongan sa mga harong. Paagi sa praktis makakanood kamong makipag-olay nin matibay sa mga tawo.
4 Igwa pa kamo nin ibang katood na makatatabang saindo. Yaon an mga payunir na nakanood nin mga paagi sa paghuhulit huli sa eksperyensia asin sa pag-atender sa Paadalan sa Payunir na Paglilingkod. An nangengenot sa saindong pag-adal sa libro o an paraataman sa paglilingkod tibaad puwede man na ibanan kamo sa pagharongharong asin orog pang ikademonstrar kun paano kakaolayon asin mangangatanosan sa mga tawo.
PAGBUWELTA SA MGA NAGPAHELING NIN INTERES
5 Interesado kita sa pagtao nin dugang pang espirituwal na tabang sa mga tawo na nag-aako sa satong babasahon. Iyan nangangahulogan na dapat kitang bumuwelta tanganing pukawon an dugang pang interes. Bago kamo dumalaw liwat, repasohon an sinabi nindo sa enot na pagsongko tanganing mas epektibo nindong ikapaliwanag an temang nakapukaw sa saindang interes. Girumdomon man na mantang kita an nagtatanom asin nagbabaribi, si Jehova an nagpapatubo. Hagadon an saiyang paggiya bago sumongko. (1 Cor. 3:6; 2 Cor. 9:10) Mantang tinatabangan niatong makanood an iba, kita mismo minaoswag.
6 An sumunod na mahalagang tangga iyo an pagpopoon asin pangengenot sa pag-adal sa Biblia. Kun dai pa nindo naabot an tanggang iyan sa saindong pag-oswag sa ministeryo, padagos na dumolok ki Jehova sa pamibi asin arangon saiya na tabangan kamong makanompong asin atamanon sa pagkakan an sarong arog-karnero. Tibaad matabangan kamo na pagmasdan kun paano an sarong epektibong paratokdo nangengenot sa sarong pag-adal sa Biblia dangan arogon an saiyang mga paagi sa pagtotokdo. Saro pa, repasohon an impormasyon manongod sa pagtotokdo arog kan yaon sa An Torrengbantayan kan Marso 1, 1985, pahina 14-23 [sa Ingles, Agosto 1, 1984, pahina 8-17]. Paagi sa pag-andam kan saindong sadiri, kamo magigin andam na mangenot sa pag-adal kun simbagon na an saindong mga pamibi.
MAGBUGTAK NIN ASIN ABOTON AN MGA PASOHAN
7 An pakaabot sa mga pasohan na mas epektibong pagtotokdo, pagdalaw liwat, asin pangengenot sa mga pag-adal nagkakaipo nin panahon. Puwede daw kamong magbugtak nin saro pang pasohan para sa saindong sadiri, an pagigin auxiliary o regular payunir? Mantang kamo padagos na minaoswag sa ministeryo, puwede kamong magin pampakosog sa iba. Makakamtan nindo an kadakol na bendisyon hale ki Jehova kun kamo dai magdadanay sa namumugtakan nindo kundi padagos na maoswag.