Pagtabang sa Bagong mga Parahayag
1 Padagos na binibendisyonan ni Jehova an saiyang banwaan paagi sa pagpalaog kan “mga kawiliwiling bagay kan gabos na nasyon.” (Hag. 2:7) Kaidtong nakaaging taon nin paglilingkod may nakadagdag na haros 6,000 na bagong parahayag sa Pilipinas. Kamawotan niato ngonyan na tabangan an mga ini na magin mas epektibong “mga parasira nin tawo.”—Mar. 1:17.
2 Noarin maiimbitaran an sarong inaadalan sa Biblia na umiba sa sato sa paglilingkod sa langtad? Bago ipamidbid an saiyang sadiri sa publiko bilang Saksi, kaipuhan na maabot nia nguna an Makakasuratan asin organisasyonal na mga kahagadan na sinasabi sa librong Our Ministry sa pahina 98 asin 99. An mga hapot dian makatatabang saindo na determinaran kun baga naaabot kan inaadalan sa Biblia an mga kahagadan na ini. Kun kuwalipikado na sia, puwede na siang imbitaran na makikabtang sa paghuhulit asin ireport an saiyang aktibidad sa kongregasyon. Kun may kuwalipikado na sa mga inaadalan nindo, an Abril marahay na oportunidad na papoonon sinda sa paglilingkod.
3 An bagong mga parahayag tibaad may kaigotan asin entusiasmo pero kulang nin kabatidan. Tibaad matabangan nindo sindang makikabtang paagi sa pag-alok nin pulyeto o mga magasin, o puwedeng pabasahon nindo sinda nin sarong teksto. Komendaran sinda para sa kaigotan nindang makikabtang. Tabangan sindang “magpadagos sa pagkamaygurang.”—Heb. 6:1.
PAG-OSWAG
4 Kun paanong an mga aki nakakanood na maglakaw paagi sa paglakad nin saro-saro, an bagong mga parahayag matatabangan man nin tangga-tangga. Kun tinotokdoan nindo an sarong bagong parahayag, sia daw progresibo nindong matatabangan na tumao kan pataratara sa tata, gamiton an Topikong Mapag-oolayan, asin iatubang an alok na babasahon? Andam na daw siang makanood kun paano magbubugtak kan pundasyon para sa pagdalaw liwat asin sa huri pag-adal sa Biblia? An pagpraktis asin pag-iba sa saiya sa paglilingkod makatatabang saiya na magibo an progresibong mga tanggang ini.
5 Kun kamo magurang, tinatabangan daw nindo an saindong mga aki na nakaaabot sa Makakasuratan na mga kahagadan na umoswag sa ministeryo? Dai pagmenuson an abilidad kan saindong mga aki na umoswag. An dakol na aki nakapaheling nin marahay na abilidad sa pagpasakamot nin babasahon asin pagpopoon asin pangengenot sa mga pag-adal. Subaybayan an saindong mga aki. Papoonon sinda mantang sadang pa. Tabangan sindang magtalubo sono sa saindang abilidad. Komendaran sinda para sa saindang paghihingoa asin pag-oswag.—Helingon an Our Ministry, pahina 99-100.
6 An gabos na nagdusay na lingkod ni Jehova maninigong maghingoa na umoswag sa epektibong pag-aatubang kan maogmang bareta. Tabangan an mga bagohan na bako sanang pumoon sa ministeryo sa langtad kundi umoswag sa saindang abilidad sa pag-agi nin panahon.—1 Tim. 4:15, 16.