Pag-aatubang kan Maogmang Bareta—Kaiba an mga Bagohan
1 Makangangalas nanggad na bentaha na magkaigwa kita nin kairibang eksperyensiadong mga parahayag! Sinda tunay na kayamanan kan kongregasyon mantang ginagamit ninda an saindang kabatidan sa pagtabang sa dakol na bagohan na nagraralaog sa organisasyon ni Jehova ngonyan. Isinasapuso ninda an sadol: “Kaoyon sa sokol nin balaog na naako kan lambang saro, gamiton iyan sa paglingkod sa lambang saro.”—1 Ped. 4:10.
2 An mga aprobadong kaasosyar asin an mga bagong mabautismohan maninigong komendaran para sa saindang kahigosan sa ministeryo. Minsan siring, an eksperyensia ninda tibaad limitado sa saro o duwang kabtang kan paghuhulit, arog baga kan pagwaras nin magasin asin impormal na pagpatotoo. Tanganing mahayag an saindang pag-oswag, kaipuhan na makikabtang sinda sa pinakadakol na kabtang kan ministeryo na mapupuwede. An mga bagohan matatabangan na magin ekspertong mga ministro kan Kahadean paagi sa pag-iba sa mga mas eksperyensiado.—Ecl. 4:9, 10.
MAGBOLUNTARYO
3 Puwede daw kamong magboluntaryo na tumabang sa iba sa ministeryo? An mga bagohan kaipuhan na makanood kun paano gagamiton an Biblia sa pagharongharong. Kaipuhan sindang makanood kun paano makikipag-olay sa mga kagharong. An sarong bagohan tibaad natatakot na dumalaw liwat asin mangenot sa mga pag-adal sa Biblia. Pero an mga gusto puwedeng makanood kun aakoon ninda an kinakaipuhan na tabang asin pagdagka.
PAANO DAW KAMO MAKATATABANG?
4 An sarong paagi na kamo makatatabang makitagbuan sa mga dai pang gayo nin eksperyensia asin pag-olayan an mga pag-aatubang sa An Satong Ministeryo sa Kahadean. Ginagamit an librong Reasoning, pumili nin angay na mga introduksion asin praktison an pagsimbag sa mga pagtumang. Puwede nindong pag-olayan kun paano tatapuson an enot na pagdalaw tanganing makabugtak nin pundasyon para sa pagdalaw liwat, o puwede nindong ipaheling kun paano mapoponan an pag-adal sa Biblia. An siring na pag-andam matao sa bagohan kan kompiansa na makipag-olay sa mga tawo manongod sa Tataramon nin Dios.
5 Gumibo nin depinidong areglo na mag-iba sa ministeryo sa langtad. Sa primero tibaad gusto sana kan bagohan na magmasid. Dangan puwede niang probaran na gibohon an inandam sa mga pagpraktis nindo. Pag-olayan kun paano magigibo an pag-oswag. Magin nakapakokosog asin mapagsuportar. Ipagirumdom sa mga bagohan na ini gibohon ni Jehova asin bebendisyonan nia an satong sadiosan sa pusong mga paghihingoa.—Mat. 11:29, 30.
IBANAN MAN AN MGA HOBENES
6 An mga hobenes orog na naoogma sa ministeryo kun sinda may inandam na gayong pag-aatubang. An mga aki puwedeng dagkahon na gumibo nin simpleng pag-alok nin magasin. Kun kaya, puwede sindang tawan nin oportunidad na bumasa nin teksto sa Biblia. Tabangan an lambang saro na umoswag sono sa saiyang edad asin kakayahan.
7 An mga may inaadalan sa Biblia magmamawot na iintrodusir an inaadalan sa paglilingkod sa langtad oras na kuwalipikado na sinda. An kamagurangan, ministeryal na mga lingkod, payunir, asin magurang maninigo man na mag-alistong mag-opresir nin tabang sa mga nagpopoon pa sanang makikabtang sa paghuhulit. Puwede daw kamong magboluntaryo na tumabang sa mga bagohan? Paagi sa oroyon na pagtarabangan kan gabos, mahahayag an pagtalubo pasiring sa pagkamaygurang.—Efe. 4:16.