Gibohon an Gabos na Bagay sa Ikamumuraway nin Dios
1 Abaa kanakarerepresko na makiasosyar sa satong mga tugang! (1 Cor. 16:17, 18) Ginigibo niato ini sa mga pagtiripon, sa mga asamblea, asin sa ministeryo. Nakiaasosyar man kita kun may nagsosongko satong mga bisita sa harong niato. Sa paggibo kaiyan, ipinaheheling niato an pagpasakat asin nakapagpapakinosogkosogan.—Roma 12:13; 1 Ped. 4:9.
2 Inorganisar na Sosyal na mga Okasyon: Baga man kita ‘nagkakakan o nag-iinom o ano man an ginigibo,’ maninigo niatong “gibohon an gabos na bagay sa ikamumuraway nin Dios.” (1 Cor. 10:31-33) An hatol na ini dai kinukuyog nin nagkapira, asin kun siring parateng nagkakaigwa nin mga problema huli sa darakulang sosyal na katiriponan kun saen itinatampok an kinabanon na aling-alingan. Nakaaagid nanggad an mga ini sa kinabanon na mga okasyon, na an espiritu kaiyan bakong kaoyon sa mga prinsipyo kan Biblia.—Roma 13:13, 14; Efe. 5:15-20.
3 Irineport na an darakulang bilang nin mga Saksi nagtiripon sa arkiladong mga pasilidad kun saen nag-aaling-aling sinda paagi sa iskeyting, baraylehan, asin karakanan. Huli sa kadepisilan sa tamang pamamahala sa siring kadarakulang grupo, nagkaigwa nin mga problema. Pagigin maribok, pagpangana sa mga inomon na de alkohol, asin inmoralidad pa ngani an kun beses nagigin resulta. (Efe. 5:3, 4) An siring na sosyal na mga katiriponan dai nagtataong onra ki Jehova. Imbes, iyan nagtatao nin langhad sa kongregasyon asin ikinasisingkog nin iba.—1 Cor. 10:23, 24, 29.
4 Dinadagka an mga Kristiano na magpaheling nin pagpasakat, pero an pagdodoon maninigong isentro sa espirituwal na pagpakinosogan. (Roma 1:11, 12) Parateng pinakamarahay an saradit na pagtiripontipon. An librong Our Ministry nagsasabi sa pahina 135-6: “Paminsanminsan, nagkapirang pamilya an puedeng imbitaran sa harong para sa Kristianong pakiaasosyar. . . . Makatanosan nanggad, an mga kag-imbitar sa siring na mga okasyon maninigo na personalmenteng makamate na responsable sa kun ano an nangyayari. Isinasaisip ini, naheling kan mapagmansay na mga Kristiano an kadonongan nin paglimitar sa kadakulaan kan siring na mga grupo asin sa Iawig kan mga katiriponan.” Ipinaheling ni Jesus na dai niato kaipuhan na mag-andam nin dakol na bagay kun an satong pasohan iyo na pakosogon sa espirituwal an satong mga katood.—Luc. 10:40-42.
5 Marahay na magpaheling nin pagpasakat sa mga kapwa Kristiano. Minsan siring, dakula an pagkakalaen nin simpleng katiriponan sa satong harong asin nin madetalyeng okasyon na nagpapabanaag nin kinabanon na espiritu sa sarong arkiladong pasilidad. Kun nag-iimbitar kamo nin iba bilang saindong mga bisita, maninigo nindong pagdanayon na sadit sana an grupo tanganing magin kamong lubos na responsable sa kun ano an nangyayari.
6 Paagi sa pagpaheling nin pagkasimple asin pagkamakatanosan sa sosyal na mga aktibidad, makatatao kita nin kamurawayan sa satong Dios asin makapakokosog sa iba.—Roma 15:2.