Regular na Pag-atender sa mga Pagtiripon—Kaipuhan sa Satong Marigon na Paninindogan
1 Sa mga pagtiripon sa kongregasyon pinag-oorolayan niato an kapakipakinabang na mga kaisipan asin sinasangkapan kita nin espirituwal na pangalasag tangani kitang “marigon na makapanindogan tumang sa mga pakana kan Diablo.”—Efe. 6:11; Fil. 4:8.
2 Itinatao kan mga Pagtiripon an Satong Pangangaipo: Sa mga pagtiripon idinodolot an mga pamibi sa pag-omaw sa Dios asin sa pag-arang sa saiya para sa mga pangangaipo kan kongregasyon. (Fil. 4:6, 7) An pagpartisipar sa mga kantang pan-Kahadean nakapaoogma sa sato asin pinangyayari kita na ipahayag an satong mga saboot mantang sinasamba niato si Jehova. (Efe. 5:19, 20) An satong pakiaasosyar sa Kingdom Hall bago asin pakatapos kan mga pagtiripon nakadadagka sato, nakaparirigon sato, asin nakarerepresko sato.—1 Tes. 5:11.
3 Kan nakaaging Abril an espesyal na pahayag na “Harani Na an Katapusan kan Falsong Relihion” mapuersang idinoon an pagkaapurado na lumuwas tolos sa Dakulang Babilonya. (Kap. 18:4) Durante kan Hunyo asin Hulyo, nakapahiro nanggad na pag-olayan an tolong artikulo na pinag-adalan sa Torrengbantayan manongod sa mga kilyab nin liwanag na nakapaliwanag sa dana kan mga matanos! (Tal. 4:18) Isip-isipa kun ano an satong nalipasan kun napabayaan niato an pag-atender sa mga pagtiripon na idto.
4 Siring sa idinodoon kan Organized to Accomplish Our Ministry sa pahina 72, an Teokratikong Paadalan sa Pagmiministro sarong probisyon para sa nagpapadagos na edukasyon kan bilog na kongregasyon. Sa presente tinatabangan kita na magin mas pamilyar sa kasaysayan kan organisasyon paagi sa paggamit kan librong Proclaimers. Dai niato puedeng lipasan an edukasyon na ini.
5 Sinasangkapan kita kan satong Pagtiripon sa Paglilingkod na magin mas epektibo sa ministeryo. Iinilustrar ini kan pagtiripon na duman inako niato an mga instruksion sa pagdistribwir kan Kingdom News Num. 34. Nagin abunda an bendisyon ni Jehova sa gibohon na ini, siring sa maheheling sa pambihirang mga resulta sa bilog na kinaban. (Ikomparar an 2 Corinto 9:6, 7.) An mga regular na nag-aatender sa mga pagtiripon nagtabang na magkaigwa nin pagsuportar sa kampanya.
6 Sa Pag-adal sa Libro kan Kongregasyon, nag-oorog an satong pakamate nin pag-apura huli sa mga bagay na satong nanonodan sa mga librong pinag-aadalan niato. Huli sa marikas na mga pangyayari sa kinaban, kaipuhan niatong masabotan an kaotoban kan mas hararom na mga hula sa Biblia.
7 Ipaorog an Regular na Pag-atender sa mga Pagtiripon: Sa dakol na kadagaan minimidbid kan satong mga tugang kun gurano kahalaga kan mga pagtiripon sa kada semana. Halimbawa, sa Burundi, Rwanda, Liberia, patin Bosnia asin Herzegovina, kadakoldakol kan bagohan na nakikipagtipon kaya an mga nag-aatender duwa o tolong beses na doble kisa sa total na bilang nin mga parahayag. Sa paaging ini tinatabangan ni Jehova an mga tugang na magdanay na marigon sa sarong espiritu.—Fil. 1:27; Heb. 10:23-25.
8 An siisay man na tibaad napababayaan an regular na pag-atender sa mga pagtiripon maninigo ngonyan na gumibo nin mga paagi na maremedyohan an tendensiang ini. (Tal. 18:1; Ecl. 4:9-12) Tangani na marigon na makapanindogan, kaipuhan niatong makipagpakinosogan sa mga maygurang, siring sa itinatao kan regular na pag-atender sa mga pagtiripon.—Roma 1:11, 12.