Hapot
◼ Ano an maninigong gibohon kun may kalamidad na apektado an mga tugang?
Kun May Kalamidad sa Saindong Lugar: Dai mataranta. Magin kalmado, asin magkonsentrar sa kun ano talaga an mahalaga—an buhay, bakong an mga rogaring. Asikasohon an pangenot na pisikal na mga pangangaipo kan saindong pamilya. Dangan paisihon an kamagurangan dapit sa saindong mga kamugtakan asin presenteng lokasyon.
Igwa nin importanteng kabtang an kamagurangan asin ministeryal na mga lingkod sa pagtao nin ayuda. Kun may itinataong patienot na patanid manongod sa sarong kalamidad, siring kan mga bagyo, maninigong seguradohon kan mga tugang na ini na an gabos yaon sa ligtas na lugar, asin kun itinotogot nin panahon, maninigo sindang kumua asin magdistribwir nin mga suplay na tibaad kaipuhan.
Pakatapos kaiyan, maninigong hanapon kan mga nagkokondukta sa pag-adal sa libro an kada pamilya asin aramon an saindang kamugtakan. Maninigong paisihon an nangengenot na paraataman o an sarong magurang sa kongregasyon manongod sa situwasyon kan kada pamilya, dawa kun marahay an kamugtakan. Kun may nadanyaran, pagmamaigotan kan kamagurangan na iareglo an pagbolong. Matao man sinda nin materyal na mga bagay siring baga kan pagkakan, gubing, istaran, o mga suplay sa harong na kaipuhan. (Juan 13:35; Gal. 6:10) Matao an lokal na kamagurangan nin espirituwal asin emosyonal na suporta sa kongregasyon patin iaareglo ninda sa pinakamadaling panahon na mapupuede na ikapadagos an mga pagtiripon sa kongregasyon. Pakatapos nin maingat na ebalwasyon, maninigong kontakon nin sarong magurang sa kongregasyon an paraataman sa sirkito tangani na impormaran sia manongod sa siisay man na nadanyaran, danyos sa Kingdom Hall o sa mga harong nin mga tugang. Dangan sisiyasaton kan paraataman sa sirkito an iba pang mga kongregasyon tangani na maheling kun gurano kalakop an problema, na pakatapos kaiyan matelepono o matelegrama sia sa sangang opisina kaiba an report kan situwasyon.
Kun May Kalamidad sa Ibang Lugar: Girumdomon sa saindong mga pamibi an apektadong mga tugang. (2 Cor. 1:8-11) Kun mawot nindong magtao nin tabang na kuarta, puede nindong ipadara sa Sosyedad an saindong mga donasyon, na dian itinatagama an ayudang pondo para sa katuyohan na ini. An adres: Watch Tower Society, P. O. Box 2044, 1060 Manila. (Gibo 2:44, 45; 1 Cor. 16:1-3; 2 Cor. 9:5-7; helingon an Disyembre 1, 1985 Watchtower, pahina 20-2.) Dai ipadara an materyales o mga suplay sa lugar nin kalamidad apuera sana kun espesipikong hinagad kan mga tugang na namamahala. Malilikayan kaini an pagkaribaraw asin masisierto an tamang pagdistribwir kan kinakaipuhan.—1 Cor. 14:40.
Pakatapos nin tamang pag-ebalwar, dedeterminaran kan Sosyedad kun maninigong bumilog nin komite para sa pag-ayuda. Paiisihon an responsableng mga tugang. An gabos maninigong makipagtabangan sa kamagurangan tanganing ikatao nin igo an pangenot na mga pangangaipo kan gabos na tugang.—Helingon an Jehovah’s Witnesses—Proclaimers of God’s Kingdom, pahina 310-15.