Hingoahon na Makaolay an mga Agom na Daing Pagtubod
1 Dahelan nin dakulang kagayagayahan kun sararo an mga mag-agom sa tunay na pagsamba. Minsan siring, sa dakol na pamilya saro sana sa mag-agom an nag-ako kan dalan kan katotoohan. Paano niato hihingoahon na makaolay an mga agom na ini na daing pagtubod asin enkaminaron sinda na sumamba ki Jehova kaiba niato?—1 Tim. 2:1-4.
2 Saboton an Saindang Kaisipan: Minsan ngani tibaad kontra an nagkapirang agom na daing pagtubod, sa kadaklan na panahon an problema pagkaindiperente o dai pagkasinabotan. An saro tibaad nakamamateng pinababayaan o nag-iimon huli sa bagong manompongan na espirituwal na interes kan saiyang agom. “Kun nagsosolo sa harong, nakamamate akong pinababayaan,” an nagigirumdoman nin sarong agom na lalaki. “Namamatean kong garo ako inaabandonar kan sakong agom asin mga aki,” an sabi nin saro pa. May mga lalaki na tibaad naghohona na mawawara na sa sainda an saindang pamilya huli sa sarong relihion. (Helingon an Agosto 15, 1990 Watchtower, pahina 20-3.) Iyan an dahelan na pinakamarahay para sa agom na lalaki, kun mapupuede, na paibahon sa saiyang agom sa areglong pag-adal sa Biblia sa harong sa pagpoon pa sana.
3 Maghulit na Magkaibanan: An sarong mag-agom na Saksi epektibong naghuhulit na magkaibanan sa pagtabang sa mga mag-agom na makalaog sa katotoohan. Pakatapos na an tugang na babae makaestablisar nin pag-adal sa agom na babae, dinadalaw kan tugang na lalaki an agom na lalaki asin sa parate nakapopoon nin pag-adal.
4 Magin Makikatood Asin Mapag-istimar: Makatatabang an mga pamilya sa kongregasyon paagi sa pagpaheling nin interes sa mga pamilya na bako pang sararo sa tunay na pagsamba. An nagkapirang makikatood na pagdalaw puedeng makatabang sa agom na daing pagtubod na maheling an Mga Saksi ni Jehova bilang nakaoogma, may pagmakolog na mga Kristiano na interesado sa ikararahay kan lambang saro.
5 Sa panapanahon, puedeng repasohon kan kamagurangan kun anong mga paghihingoa an nagibo na sa dai pa sana nahahaloy tangani na makaolay an mga agom na daing pagtubod asin kun ano pa an magigibo sa paglaom na madagka sinda ki Jehova.—1 Ped. 3:1, nota sa ibaba.