Nagtatao si Jehova nin Kosog na Lihis sa Ordinaryo
1 An mahalagang marhay na pribilehio nin sagradong paglilingkod—an Kristianong ministeryo—ipinagkatiwala sa gabos na disipulo ni Jesus. (Mat. 24:14; 28:19, 20) Alagad, an pagkabakong sangkap nin tawo asin an mga pan-iimpluwensia kan palakaw na ini nin mga bagay kun beses puedeng magcausa sa sato na mansayon an satong sadiri na biyong nagkukulang.
2 Kun mangyari ini, puede kitang maranga kan surat ni apostol Pablo sa linahidan na mga Kristiano sa Corinto. Sia nagsurat: “Igwa kami kan kayamanan na ini sa mga lalagan na laboy.” (2 Cor. 4:7) Kompiado si Pablo: “Mantang igwa kami kan ministeryong ini . . . , dai kami minasuko.” (2 Cor. 4:1) Totoo, angat sa kada saro sa sato, baga man linahidan o “ibang karnero,” na padagos na magpahayag kan maogmang bareta asin ‘dai sumuko.’ Kaipuhan niato nin kosog gikan sa Dios, na nagtatao nin “kosog na lihis sa ordinaryo.”—Juan 10:16; 2 Cor. 4:7b.
3 Nakaparirigon nanggad sa boot na dakol na Saksi an maigot na ebanghelisador sa ibong kan pangangaipong atubangon an makuring marhay na pagtumang, seryosong mga problema sa salud, o limitadong pinansial. Dapat na marealisar niato gabos na an satong asignasyon na maghulit suportado ni Jehova. Imbes na togotan an pagkadesganar o pagkahandal na paluyahon an satong desisyon na maghulit, kita “padagos na magkua nin kapangyarihan sa Kagurangnan asin sa puersa kan saiyang kosog.”—Efe. 6:10; Tal. 24:10.
4 Kun Paano Magkakaigwa kan Kosog nin Dios: Magmaigot sa pamibi, na inaarang an tabang asin kosog nin Dios. (Roma 12:12; Fil. 4:6, 7) Dangan, sa bilog nindong puso, magtiwala ki Jehova na itatao an kosog na lihis sa ordinaryo. (Tal. 3:5) Basahon an mga estorya nin buhay sa presenteng aldaw sa satong mga magasin, huli ta iyan nagtatao nin ebidensia na tinatabangan ni Jehova an saiyang mga lingkod ngonyan na matagalan an mga pagbalo. Magdanay na dayupot sa mga tugang sa kongregasyon, asin dai pagpabayaan an mga pagtiripon sa kongregasyon.—Roma 1:11, 12; Heb. 10:24, 25.
5 Gibohon logod niato an bilog niatong makakaya na makalinyang mag-ako kan kosog ni Jehova—kosog na lihis sa ordinaryo asin matabang sa sato na dai sumuko sa pinakaimportanteng gibohon na paghuhulit kan Kahadean.