Sarong Gibohon na Sinusuportaran nin Dios
1 Sa tahaw kan mga lingkod nin Dios ngonyan, pira sana an igwa nin halangkaw na edukasyon, kayamanan, o pagkaprominente sa presenteng sistema nin mga bagay. Huli sa rason na iyan, may mga tawo na hinahaboan an satong ministeryo na garo bakong mahalaga iyan. (Isa. 53:3) Minsan siring, an pagtotokdo sa Biblia na ginigibo niato nagtaong karangahan asin paglaom sa minilyon na tawo sa bilog na kinaban. Paano nakamtan nin ordinaryong mga tawo an siring na pambihirang mga resulta? Solamente paagi sa pagsuportar nin Dios. (Mat. 28:19, 20; Gibo 1:8) “Pinili nin Dios an mga maluya sa kinaban,” an paliwanag ni apostol Pablo, “tanganing supogon nia an mga makosog.”—1 Cor. 1:26-29.
2 An mga apostol asin iba pang Kristiano kan enot na siglo sa kadaklan “daing inadalan asin ordinaryo.” (Gibo 4:13) Pero, pusoan nindang sinusunod an sugo sa sainda na ihulit an maogmang bareta, asin binendisyonan ni Jehova an saindang mga paghihingoa. Sa ibong kan mga olang asin pagtumang, ‘an tataramon ni Jehova padagos na nagtatalubo asin nangingibabaw sa makakamhan na paagi.’ Mayong makakapapondo sa gibohon huli ta iyan sinusuportaran nin Dios. (Gibo 5:38, 39; 19:20) Totoo man ini sa presenteng mga panahon. Dawa an determinadong pagtumang nin makapangyarihan na mga namamahala dai nakapogol sa maogmang bareta na padagos na mangibabaw asin magtalubo.—Isa. 54:17.
3 Sa Dios an Gabos na Kredito: An sato daw na pinaboran na kamugtakan bilang mga ministro nin Dios nagtatao sa sato nin dahelan na ipaghambog an satong sadiri? Dai nanggad. Nagtataram manongod sa Kristianong ministeryo, nagsurat si Pablo: “Igwa kami kan kayamanan na ini sa mga lalagan na gibo sa dalipay, tanganing an puersa na labi sa ordinaryo magin sa Dios asin bakong an gikan mismo sa samo.” (2 Cor. 4:7) Minidbid ni Pablo na nahimo niang magibo an saiyang ministeryo solamente paagi sa kosog na itinatao nin Dios.—Efe. 6:19, 20; Fil. 4:13.
4 Minimidbid man niato na iyan huli sana ta “nakamtan [niato] an tabang hale sa Dios” kaya nagigibo an paghuhulit. (Gibo 26:22) Paagi sa siring na pambilog na kinaban na pagbalangibog, ginagamit kita ni Jehova sa pambihirang paagi tangani na magpakunogkunog sa mga nasyon—sarong anino kan mapaghokom na paglaglag na madali nang umabot. (Hag. 2:7) Kanigoan na pribilehio niato na magin “mga kapwa trabahador nin Dios” sa dakulang pag-ani sa espirituwal!—1 Cor. 3:6-9.