Pahalagahan an Saindong Pribilehio nin Paglilingkod
1. Ano an pagmansay nin dakol sa kinaban sa paghuhulit niato?
1 Para sa dakol sa kinaban ni Satanas, “karungawan” an paghuhulit niato. (1 Cor. 1:18-21) Kun bako kitang maingat, an biribid na pagmansay na ini puedeng makadesganar sa sato asin makapaluya sa kaigotan niato. (Tal. 24:10; Isa. 5:20) Ano an mga dahelan niato na pahalagahan an satong pribilehio bilang Mga Saksi ni Jehova?—Isa. 43:10.
2. Taano an ministeryo ta puedeng apodon na sarong “banal na gibohon”?
2 Sarong “Banal na Gibohon”: Inapod ni Pablo an ministeryo na sarong “banal na gibohon.” (Roma 15:15, 16, NW) Paano iyan sarong “banal na gibohon”? Paagi sa pakikikabtang dian, kita nagigin “katabang” kan Saro na “banal,” si Jehova, asin nakakakontribwir kita sa pagpakangbanal sa ngaran nia. (1 Cor. 3:9; 1 Ped. 1:15) Para ki Jehova, an paghuhulit niato sarong “atang nin pagomao,” kaya an ministeryo sarong mahalagang marhay na aspekto kan satong pagsamba.—Heb. 13:15.
3. Taano ta sarong dakulang onra an paghuhulit kan maogmang bareta?
3 An paghuhulit kan maogmang bareta sarong dakulang onra na kadikit sana an nagkakamit. Ikakaogma kan mga anghel an siring na asignasyon asin mayong duda na magigibo ninda iyan sa epektibong marhay na paagi. (1 Ped. 1:12) Minsan siring, kita na bakong perpektong mga tawo, na siring sa “magña lalagan na daga,” pinili ni Jehova para sa pambihirang pribilehio na ini!—2 Cor. 4:7.
4. Paano niato ikakapaheling na pinapahalagahan niato an ministeryo?
4 Sarong Prioridad: Huling pinapahalagahan talaga niato an satong pribilehio, para sa sato an ministeryo saro sa “magña bagay [sa buhay niato] na orog karahay.” (Fil. 1:10) Kun siring, nag-iiskedyul kita nin panahon kada semana tanganing makikabtang dian. An sarong musikero na nagpapahalaga sa pribilehio nia na magtugtog sa sarong orkestra na bantog sa kinaban, mag-aandam para sa kada pagtugtog asin maghihingoang paoswagon an abilidad nia. Kaagid kaiyan, mag-aandam kita bago makikabtang sa ministeryo tanganing ‘magamit niato nin matanos an tataramon nin katotoohan,’ asin maghihingoang paoswagon an satong abilidad sa ‘pagtotokdo.’—2 Tim. 2:15; 4:2.
5. Siisay an nagpapahalaga sa ministeryo niato?
5 Dai pagtogotan na makadesganar sa saindo an pagmansay nin kadaklan na tawo. Girumdomon na dakol pa sa satong teritoryo an nagpapahalaga sa mga pagdalaw niato. Minsan siring, bakong pag-oyon nin mga tawo an pinagmamaigotan tang kamtan. Mas mahalaga nanggad an namamatean ni Jehova, asin pinapahalagahan niang marhay an maigot na paghihingoa niato.—Isa. 52:7.