Pinagtiwalaan nin Sarong Kayamanan
1 Pinahalagahan ni apostol Pablo an sugo na itinao sa saiya nin Dios na maghulit asin inapod nia iyan na sarong “kayamanan.” (2 Cor. 4:7) Nagtagal sia nin mga kasakitan asin persekusyon sa paggibo kan sugong iyan. Daing kapagalan siang naghulit sa siisay man na nasusumpongan nia. Sia nagbaklay sa daga asin nagbiahe sa dagat na may dakol na kadepisilan asin peligro. Paano niato maaarog si Pablo asin ikakapaheling na mahal niato an satong ministeryo? (Roma 11:13) Ano ta daing kaparehong kayamanan an satong ministeryo?
2 Sarong Nakakalabing Kayamanan: An daganon na mga kayamanan sa parate may kaibang grabeng kamondoan asin nagbubunga nin limitado sana o temporaryong mga pakinabang. Sa ibong na lado, an satong ministeryo nagtatao sa sato asin sa iba nin nagdadanay na mga pakinabang. (1 Tim. 4:16) Tinatabangan kaiyan an sinserong mga tawo na mamidbid si Jehova, gumibo nin kinakaipuhan na mga pagbabago sa saindang buhay, asin magkamit nin tunay na paglaom na buhay na daing katapusan. (Roma 10:13-15) Paagi sa halangkaw na pagpahalaga sa satong ministeryo, kita nagkakaigwa nin nakakakontentong katuyohan sa buhay, nagdadanay na pakamate na may nagibo, asin nakakaogmang marhay na paglaom para sa ngapit.—1 Cor. 15:58.
3 Ipaheling na Pinapahalagahan Nindo an Saindong Kayamanan: An pagpahalaga niato sa sarong bagay parateng naheheling paagi sa kun ano an andam niatong isakripisyo para dian. Kanigoan na pribilehio na gamiton an satong panahon asin kosog sa pag-omaw ki Jehova! (Efe. 5:16, 17) An paagi kan paggamit niato kan satong panahon maninigong magpaheling na mas pinapahalagahan niato an espirituwal na mga bagay kisa sa materyal na mga okupasyon. Mantang igwa kita nin mahalagang marhay nanggad na bagay na ikakatao, bobooton niato na maghulit na may entusiasmo asin magin listo sa pagsabi kan maogmang bareta sa gabos na oportunidad.
4 Sa parate, an daing kaagid sa halaga na mga kayamanan dai nakatago kundi nakaeksibir tangani na maheling nin iba. Kun an pagmansay niato sa satong ministeryo sarong kayamanan, iyan magigin risang-risang kabtang kan satong buhay. (Mat. 5:14-16) Paagi sa puso na pano nin pag-apresyar, logod na pirme niatong arogon si apostol Pablo asin aprobetsaran an gabos na oportunidad na ipaheling na talagang pinapahalagahan niato an satong ministeryo, na minamansay iyan na sarong kayamanan.