Paghuhulit—Sarong May Onrang Pribilehiyo
1 An ministeryo kan maogmang bareta sarong may onrang pribilehiyo na itinao sa sato ni Jehova. (Roma 15:16; 1 Tim. 1:12) Siring daw kaiyan an pagmansay nindo? An pagdara kan ngaran nin Dios onra na itinatao sana sa pipira. Paano niato mapapatalubo an satong pagpahalaga sa pribilehiyong ini?
2 An paghuhulit kan mensahe nin Kahadean dai nagtatao sa sato kan pag-oyon nin kinaban. Dakol an minamansay an satong gibohon na may pagkaindiperente. An iba tinutuya asin tinutumang iyan. Sa saindang pagheling tibaad garo kita nalagalag asin tonto. (Juan 15:19; 1 Cor. 1:18, 21; 2 Tim. 3:12) An saindang nakapanluluya sa boot na mga komento sa katuyohan na inaan an satong kaigotan asin magcausa sa sato na talikdan an satong may onrang pribilehiyo. An negatibong mga punto-de-vista pinalalakop ni Satanas, na ‘binuta an isip kan mga dai nagtutubod, tanganing an liwanag kan mamuraway na maogmang bareta dai sumirang.’ (2 Cor. 4:4) Ano an saindong reaksion?
3 Mahalaga na isaisip na an satong paghuhulit dapit sa Kahadean iyo an pinakaimportanteng gibohon na puwedeng gibohon nin siisay man sa sato ngonyan. (Roma 10:13-15) An pagkakaigwa kan pag-oyon nin Dios, bakong kan tawo, iyo an importante. An negatibong punto-de-vista kan kinaban dai nakakapadisganar sa sato sa mapusong pagpahayag kan maogmang bareta.—Gibo 4:29.
4 Pinahalagahan na gayo ni Jesus an saiyang pribilehiyo na gibohon an kabotan kan saiyang Ama. (Juan 4:34) Dai nia tinogotan an arin man sa mga nakalilingling o paratumang na paluyahon sia. An paghuhulit kan mensahe nin Kahadean perming enot sa saiyang buhay. (Luc. 4:43) Pinagbobotan kita na arogon an saiyang halimbawa. (1 Ped. 2:21) Sa paggibo kaiyan naglilingkod kita bilang “mga katabang nin Dios.” (1 Cor. 3:9) Lubos daw niatong inaaprobetsaran an pribilehiyong ini? Bilang mga Saksi ni Jehova, maninigo kitang perming magin andam na ‘magpahayag sa publiko kan saiyang ngaran.’—Heb. 13:15.
5 An satong pakikikabtang sa ministeryo minadepende sa kadaklan sa satong kaisipan. Pinahahalagahan daw niato nin marhay an gabos na ginibo ni Jehova para sa sato? Pinatalubo daw niato sa satong puso an pagkamoot ki Jehova na nagmomotibar sa sato na gibohon an gabos niatong makakaya sa paglilingkod sa saiya? An siring na pagkamoot minomotibar kita na magin danay asin regular sa paghuhulit kan Kahadean sagkod na itinotogot kan satong mga kamugtakan. An satong kaigotan magtatao kan ebidensia sa satong pagkamoot ki Jehova asin sa satong kataed.—Mar. 12:30, 31.
6 Ipinaheheling niato kun gurano niato pinahahalagahan na marhay an sarong bagay paagi sa ginigibo niato dian asin sinasabi dapit kaiyan. Talaga daw na pinahahalagahan niato an satong pribilehiyo na maghulit dapit sa Kahadean? Pinamumuraway daw niato an satong ministeryo? Determinado daw kitang magmaigot sa mahalagang gibohon na ini sa ibong nin paglamag? Kun pinahahalagahan niatong marhay an makangangalas na pribilehiyong ini, sierto kitang magigin maigot asin bilog an puso.—2 Cor. 4:1, 7.