Dapat na Papagdanayon Niato an Satong Kaigotan Para sa Ministeryo

¹ Kada taon poon kan 1992, an Mga Saksi ni Jehova maigot na nagdusay nin labing sarong bilyon na oras sa pambilog na kinaban na paghuhulit kan Kahadean asin sa paggibo nin mga disipulo. Naoogma nanggad kita na magkaigwa nin sadit na kabtang sa siring kamakangangalas na nagibo!—Mat. 28:​19, 20.

² Siempre, an gabos na pasasalamat asin kaomawan para ki Jehova sana, na nagsusustenir sa sato sa satong ministeryo durante kan “delikadong mga panahon” na ini. (2 Tim. 3:1) Ano an kahagadan sa sato tanganing padagos kitang magkaigwa nin maigot na pakikikabtang sa mahalagang gibohon na ini?

³ Basehan Para sa Kaigotan: An nagmomotibar sa sato sa paglilingkod niato sa Kahadean iyo an hararom na pagkamoot sa Dios asin sa kapwa, saka an odok sa pusong kamawotan na otobon an satong pagdusay. (Mat. 22:37-39; 1 Juan 5:3) Pagkamoot an nagpapahiro sa sato na gumibo nin mga pagsasakripisyo tanganing magkaigwa kita nin lubos na pakikikabtang sa paghuhulit.—Luc. 9:23.

⁴ Maghingoa na Mapagdanay an Kaigotan: Ginigibo kan satong kaiwal na Diablo an gabos na paghihingoa tanganing paluyahon an satong kaigotan para sa ministeryo. An pagkaindiperente kan mga tawo sa satong teritoryo, an mga disturbo kan kinaban na ini, an kadepisilan sa pangaroaldaw na pamumuhay, asin an kapurisawan huli sa sato mismong nagluluyang salud pira sana sa mga bagay na ginagamit nia sa pagprobar na paluyahon an satong boot.

⁵ Kun siring, dapat kitang magmaigot na mapagdanay na buhay an satong kaigotan. Mahalaga na pataluboon niato an “[satong] pagkamoot kan enot.” Kalabot dian an regular na pagbasa asin paghorophorop sa Tataramon nin Dios, an Biblia, saka an pag-aprobetsar niato sa gabos na espirituwal na probisyon kan “maimbod asin mapagmansay na oripon.”—Kap. 2:⁠4; Mat. 24:45; Sal. 119:97.

⁶ Siring kan malinaw na ipinaparisa kan mga hula sa Biblia, marikas na nagdadangadang an aldaw ni Jehova para sa paglaglag sa bakong diosnon na mga tawo. (2 Ped. 2:⁠3; 3:10) Mantang malinaw na nasa isip iyan, maghingoa kita na papagdanayon an satong kaigotan para sa ministeryo, na nakikikabtang nin lubos ngonyan sa pambilog na kinaban na paghuhulit kan Kahadean asin paggibo nin mga disipulo!