Sa Panahon nin Memoryal, Aarugon Mo Daw an Kaigutan ni Jehova Asin ni Jesus?

1. Ano an hinihinguwang marhay kan Mga Saksi ni Jehova pag panahon nin Memoryal?

¹ May kaigutan na inuutob ni Jehova an saiyang katuyuhan. May koneksiyon sa nagkapira sa mga bendisyon na dadarahon kan Kahadian nin Diyos, an Isaias 9:7 nagsasabi: ‘An kaigutan ni Jehova nin mga hukbo an magibo kaini.’ An Aki nin Diyos, durante kan saiyang ministeryo digdi sa daga, nagpahiling man nin grabeng kaigutan para sa tunay na pagsamba. (Juan 2:13-17; 4:34) Taon-taon pag panahon nin Memoryal, minilyon na parahayag sa bilog na kinaban an naghihinguwang marhay na arugon an kaigutan ni Jehova asin ni Jesus paagi sa pagigin mas sibot sa ministeryo. Magigibo mo man daw iyan?

2. Mapapahiro kita kan kaigutan na gibuhon an ano magpuon Marso 7?

² Kampanya Para sa Memoryal: Ngunyan na taon, an kampanya sa pag-imbitar para sa Memoryal mapuon sa Sabado, Marso 7. Magplano na ngunyan na makikabtang nin may kaigutan sa ministeryo. Dakulang kaugmahan an mamamatian kan mga kongregasyon mantang aktibo sindang nakikikabtang para maimbitaran an pinakadakul na tawo sa saindang teritoryo sagkod sa mapupuwede. Maghinguwang marhay na imbitaran an mga tinutukduan sa Bibliya, dinadalaw liwat, katrabaho, paryente, asin kaeskuwela paagi sa pagtao nin imbitasyon o paagi sa jw.org.

3. Paano ta mapapahiwas an satong ministeryo sa bulan nin Marso asin Abril?

³ Auxiliary Payunir: An kaigutan mapahiro man sa sato na pahiwason an satong ministeryo. Siguradong dakul an makakapag-auxiliary payunir sa Marso asin Abril, huling puwede tang pilion an kahagadan na 30 oras. Sa saindong pampamilyang pagsamba o personal na pag-adal, pag-isipan asin ipamibi kun paano mo ini magigibo. (Tal. 15:22) An saimong entusiyasmo sa kampanyang ini puwedeng makapahiro sa iba na magin maigot man. Kun naggigibo ka nin mga pagliliwat tangani na mas dakul an magibo, inaarog mo an kaigutan ni Jesus.—Mar. 6:31-34.

4. Ano an resulta pag inaarog ta an kaigutan ni Jehova asin ni Jesus?

⁴ An pag-arog ta sa kaigutan ni Jehova asin ni Jesus sa panahon nin Memoryal matao nin kadakul na bendisyon. Mapapatotoohan an dakul pang tawo sa satong teritoryo. Mamamatian ta an kaugmahan asin satispaksiyon huli sa paglilingkod ki Jehova asin pagtabang sa iba. (Gui. 20:35) Urog sa gabos, mapapaugma ta an satuyang maigot na Diyos asin an saiyang Aki.