“Magin Malaad sa Espiritu”
1. Anong karakteristiko an maninigong maheling sa satong paghuhulit?
1 An gabos na aspekto kan satong Kristianong paglilingkod maninigo na nag-aabante. Kaya kita dinadagka na “magin malaad sa espiritu” asin “magpaoripon ki Jehova.” (Roma 12:11) Minsan siring, dakol na bagay an puedeng makaina kan kaigotan niato sa satong ministeryo. Paano niato ‘mapapalaad na siring sa kalayo’ an satong kaigotan asin entusiasmo sa paglilingkod niato sa Kahadean?—2 Tim. 1:6, 7.
2. Paano magkakonektar an personal na pag-adal sa Biblia asin an kaigotan sa ministeryo?
2 Personal na Pag-adal sa Biblia: An epektibong parahulit kan Kahadean namomoot sa ley nin Dios asin napapahirong marhay kan mga katotoohan na yaon dian. (Sal. 119:97) Kun nakakanood kita nin mga katotoohan sa Biblia durante nin personal na pag-adal, pinapahiro kaini an satong puso asin dinadagdagan an satong kaigotan. An pagkamoot sa Paratao kan siring na mga katotoohan asin an satong pagmawot na ihiras sa iba an maogmang bareta nagpapahiro sa sato na omawon an Dios asin ipahayag sa publiko an saiyang ngaran. (Heb. 13:15) Malinaw nanggad, an maigot na paghuhulit kan maogmang bareta nagpapaheling kan satong hararom na pagpapahalaga dian.
3. Ano an puedeng magin epekto kan espiritu nin Dios sa satong ministeryo?
3 Hagadon sa Pamibi an Espiritu nin Dios: An epektibong ministeryo dai nagigibo paagi sa sadiri niatong kosog. An tunay na kaigotan bunga nin daing olang na pagbolos kan espiritu nin Dios. (1 Ped. 4:11) An orog na pagdayupot sa Gikanan nin “dinamikong enerhiya” matao sa sato nin espirituwal na sarig nin boot na magpatotoo nin pusoan. (Isa. 40:26, 29-31) Kan si apostol Pablo mapaatubang sa kasakitan sa saiyang ministeryo, ‘nakamtan nia an tabang na hale sa Dios.’ (Gibo 26:21, 22) An nagpapakosog na banal na espiritu ni Jehova makakatabang sa sato na magin malaad sa satong ministeryo, kaya maninigo niatong hagadon iyan sa pamibi.—Luc. 11:9-13.
4. An kaigotan puedeng magkaigwa nin anong marahay na mga resulta, pero anong pag-iingat an dapat na gibohon?
4 An naglalaad na kaigotan sa paghuhulit kan Kahadean parateng nakakaolakit sa mga kapwa Kristiano na magkaigwa nin orog na kaigotan. (2 Cor. 9:2) Sa teritoryo, an mga tawo mas posibleng marhay na mahimate sa mensaheng ipinepresentar na may entusiasmo asin kombiksion. Minsan siring, an kaigotan dapat na pirmeng may kaibang taktika asin kahoyoan. (Tito 3:2) Sa gabos na panahon, naghihingoa kitang tawan nin dignidad an kagharong asin igalang an saiyang katalingkasan na pumili.
5. Anong ipinasabong na sadol an maninigo na hingoahon niatong iaplikar?
5 Bilang mga parabalangibog kan Kahadean, logod na kita pirmeng “magin malaad sa espiritu.” Kultibaron niato an kaigotan paagi sa personal na pag-adal sa Biblia asin odok na pamibi ki Jehova, an saro na makakatao sa sato nin dinamikong banal na espiritu. Paagi kaini, maigot niatong magigibo an satong ministeryo na pano nin “banal na espiritu patin makosog na kombiksion.”—1 Tes. 1:5.