Kaipuhan Kita Gabos Tangani na Matapos an Gibohon
1 Maninigong masabotan kan kada disipulo ni Jesu-Cristo na an saiyang mga paghihingoang sumuporta asin makikabtang sa paghuhulit kan Kahadean mahalagang marhay. Aram ni Jesus na an saiyang mga disipulo magpapaluwas nin mga bunga kan Kahadean sa laen-laen na bilang. (Mat. 13:23) Minsan ngani an dakulang kabtang kan paghuhulit ginigibo nin dakol na mahigos na payunir, dapat na komendaran an gabos na galagang nagpapadagos na pamurawayon an Dios paagi sa pagpaluwas nin pinakadakol na bungang mapupuede.—Juan 15:8.
2 An Iribang mga Paghihingoa Dakol an Nagigibo: Ihinula ni Jesus na an iribang mga paghihingoa kan gabos niang disipulo magbubunga nin mga gibo na orog pa kan sa saiya. (Juan 14:12) Baga man an satong personal na mga kamugtakan nakalilimitar sa magigibo niato o nagtotogot sa sato na makadusay nin dakol na oras sa paghuhulit kan Kahadean, kita gabos kaipuhan tangani na matapos an gibohon. Siring nanggad iyan kan sinabi ni Pablo: “An bilog na hawak, paagi sa pagkasorogpon na may pagkaoroyon asin pagtarabangan paagi sa lambang kabtang na nagtatao kan kinakaipuhan, sono sa igong paggibo kan lambang miembro, nagbubunga kan pagtalubo kan hawak.”—Efe. 4:16.
3 An nagkapira tibaad makamate na kadikit an saindang paghihingoa. Minsan siring, sa pagheling ni Jehova an importante iyo na magin bilog na kalag an satong paglilingkod. An gabos na ginigibo niato para sa saiya mahalaga asin inaapresyar.—Ikomparar an Lucas 21:1-4.
4 Padagos na Suportaran an Gibohon: Kita gabos may pribilehiong magkontribwir sa materyal para sa bilog na kinaban na gibohon. An nagkapira puede man na tumabang sa pisikal na trabaho na kalabot sa pagsuportar sa gibohon na pan-Kahadean. An kada saro makapaghihingoa na magtao nin inandam na marhay na mga komento sa mga pagtiripon asin magpartisipar sa Teokratikong Paadalan sa Pagmiministro. Paagi sa pag-aprobetsar sa mga oportunidad na enkaminaron an iba, kita may mahalagang ikinakokontribwir sa espirituwalidad kan kongregasyon, asin napaooswag kaini an abilidad kaiyan na taposon an gibohon na ipinagkatiwala dian.
5 Iyo, kaipuhan kita gabos tangani na matapos an gibohon. Mayo ni saro na maninigong makamate na sia dai kaipuhan. An satong iribang mga paghihingoa, kapwa dakula asin sadit, sa paglilingkod ki Jehova ipinamimidbid kita bilang an solamenteng tunay na mga parasamba sa Dios. (Mal. 3:18) An kada saro sa sato puedeng magkaigwa nin makatuyohan na kabtang sa pagtaong onra ki Jehova asin sa pagtabang sa iba na mamidbid patin paglingkodan sia.