Mga Paraataman na Nangengenot—An Nangengenot na Paraataman
1 An paglilingkod bilang paraataman sa kongregasyon sarong seryosong paninimbagan. (Gibo 20:28; 1 Tim. 3:1) Ini an enot sa serye nin mga artikulo na matao kan manlaenlaen na obligasyon kan Kristianong kamagurangan tanganing mapahalagahan niato gabos an importanteng trabaho na ginigibo ninda sa kapakanan niato.
2 An Sosyedad an nagnonombra sa nangengenot na paraataman tangani na maglingkod sa laog nin daing talaan na panahon. Mantang kinokoordinar kan nangengenot na paraataman an mga bagay, tinatabangan kaini an kamagurangan na magtao nin tamang atension sa iinasignar sa sainda na mga obligasyon. (Our Ministry, p. 42) Ano an kalabot digdi?
3 An nangengenot na paraataman an nagreresibi kan mga surat sa kongregasyon asin tolos-tolos na ipinapasa iyan sa sekretaryo tangani na sarayon. Sa pag-andam para sa mga miting kan kamagurangan, an nangengenot na paraataman naghahagad nin mga suhestion hale sa kamagurangan manongod sa mga bagay na nangangaipong pag-olayan asin tinitipon an lista nin mga puntong pag-oolayan. Sia man an naglilingkod bilang tsirman sa mga miting kan kamagurangan. Kun nagibo na an mga desisyon, sinisierto nia na nagigibo iyan nin tama. Sia an nag-aasikaso sa pag-andam kan Pagtiripon sa Paglilingkod asin sa pag-iskedyul kan mga pahayag-publiko. Sia an nag-aaprobar kan gabos na paisi sa kongregasyon, nag-aautorisar sa pagbayad kan gabos na ordinaryong gastos sa pagpunsionar, asin sineseguro nia na nagigibo an kada tolong bulan na pagsiyasat kan kuenta kan kongregasyon.
4 Bilang tsirman, kinokoordinar kan nangengenot na paraataman an gibohon kan Komite sa Paglilingkod kan Kongregasyon. Kun an sarong inaadalan sa Biblia gusto nang ibilang na dai pa bautisadong parahayag o kun an sarong dai pa bautisadong parahayag boot na magpabautismo, iinaareglo kan nangengenot na paraataman na kaolayon ini kan kamagurangan. An nangengenot na paraataman man an nangengenot sa pag-andam para sa pagdalaw kan paraataman sa sirkito tanganing an kongregasyon makinabang nin lubos sa espesyal na semana nin aktibidad.
5 Dakol asin manlaenlaen an obligasyon kan nangengenot na paraataman. Mantang mapakumbaba niang inaasikaso an mga paninimbagan nia “nin odok sa boot,” magigibo niato gabos an satong kabtang paagi sa pakikikooperar sa kamagurangan. (Roma 12:8) Kun kita “makinuyog” asin “mapagpasakop” sa mga nangengenot sa tahaw niato, magigibo ninda an saindang trabaho na may orog na tunay na kagayagayahan.—Heb. 13:17.