Makagigibo Kita nin Orog Pang mga Gibo
1 An ministeryo ni Jesu-Cristo midbid sa marahayon na mga gibo. Milagroso niang pinakakan an rinibo, binolong an dakol, asin binuhay liwat an nagkapira hale sa mga gadan. (Mat. 8:1-17; 14:14-21; Juan 11:38-44) Nakua kan aktibidad nia an atension nin sarong bilog na nasyon. Pero, kan huring banggi bago sia magadan, sinabihan nia an fiel niang mga parasunod: “An minatubod sa sako, an saro man na iyan magibo kan mga gibo na ginigibo ko; asin magibo sia nin mga gibo na orog pa kaini.” (Juan 14:12) Paano kita makagigibo nin “orog pang” mga gibo?
2 Paagi sa Pagkobre nin Dakol na Teritoryo: An sakop kan aktibidad ni Jesus limitado sana sa Palestina, mantang an enot niang mga disipulo sinabihan na magpatotoo “sagkod sa kaporoporohi kan daga,” na harayo nanggad sa hinulitan mismo ni Jesus. (Gibo 1:8) An paghuhulit na pinonan nia lakop na sa globo ngonyan, na kinokobrehan an 232 na kadagaan. (Mat. 24:14) Kamo daw lubos na nakikikabtang sa paghuhulit sa teritoryo na iinasignar sa saindong kongregasyon?
3 Paagi sa Pag-abot sa Dakol na Tawo: Medyo kadikit na disipulo an iwinalat ni Jesus tangani na ipadagos an paghuhulit. Minsan siring, bilang resulta kan saindang maigot na pagpapatotoo kan Pentecostes 33 C.E., an mga nag-ako kan katotoohan asin nabautismohan kan aldaw na idto uminabot sa mga tolong ribong kalag. (Gibo 2:1-11, 37-41) An pagtipon sa mga “may tamang tendensia sa buhay na daing katapusan” nagpapadagos sa satong panahon, na an binabautismohan niato igwa nin promedyong labing 1,000 sa sarong aldaw. (Gibo 13:48) Ginigibo daw nindo an bilog nindong makakaya na aboton an sadiosan an pusong mga tawo saen man sinda puedeng manompongan asin kultibaron tolos an interes sagkod sa mapupuede?
4 Paagi sa Paghuhulit nin Mas Halawig: An daganon na ministeryo ni Jesus limitado sana sa tolo may kabangang taon. An kadaklan sa sato mas haloy nang naghuhulit kisa dian. Gurano man kalawig na totogotan kitang ipadagos an gibohon na ini, naoogma kitang tabangan an kada bagong disipulo na makapoon sa dalan pasiring sa buhay. (Mat. 7:14) Dakol daw kamong ginigibo kada bulan sa gibohon kan Kagurangnan?—1 Cor. 15:58.
5 Makapagdadanay kitang kompiado na paagi sa pagsuportar ni Jesus sa sato, makagigibo kita nin orog pang mga gibo bilang tunay niang mga disipulo.—Mat. 28:19, 20.