Midbidon an Saindong mga Tugang
1 Ilinaladawan kan Biblia an tunay na katood na saro na labi pa kadayupot kisa sa tugang, na pinagdadanay an saiyang pagkamoot asin kaimbodan, asin na tinatabangan an saiyang kaibaiba sa panahon nin kasakitan. (Tal. 17:17; 18:24) Dai kita kukulangon nin siring na mga katood sa kongregasyon kun kita maghihingoang makamidbid asin kamotan an lambang saro.—Juan 13:35.
2 May marahay na mga oportunidad na makamidbid an satong mga tugang bago asin pakatapos kan mga pagtiripon. Taano ta dai umabot nin amay asin mahaloyhaloy pa pakatapos tangani na makamtan nindo an mainit asin maogmang pakiibaiba? Dolokon an manlaenlaen na tugang tangani na kaolayon, kabale an mga may edad nang may kabatidan asin mga hoben o masosopgon.
3 Ponan an Orolay: Dai sana pagtaratarahon an saindong mga tugang. Puede nindong ponan an orolay paagi sa pag-estorya nin eksperyensia sa ministeryo sa langtad, sarong interesanteng punto sa bagong magasin, o sarong komento dapit sa pagtiripon na katatapos pa sana. Dakol kamong manonodan manongod sa saindong mga tugang paagi sa pagigin marahay na parahinanyog, na ineenkaminar sinda na magtaram dapit sa saindang mga eksperyensia asin sa saindang mga nanonodan. Puedeng dakol kamong maaraman paagi sa paghapot sana kun paano namidbid nin saro si Jehova. An nagkapira uminagi na nin nakapakokosog sa pagtubod na mga eksperyensia sa saindang buhay, mantang an iba nagtatagal nin mga situwasyon ngonyan mismo na para sa dakol tibaad masakit na imahinaron. An pakaaram kaini makatatabang sa sato, bilang tunay na mga katood, na magin mapagrisa asin madinamay sa mga pangangaipo nin iba.
4 Makipagkatood sa Lambang Saro: Pagkagadan kan saiyang sadit na aki, an sarong tugang na babae nadepisilan na umawit nin mga awit na pan-Kahadean na nagsasambit kan pagkabuhay liwat. Nagigirumdoman nia: “Sarong beses, an sarong tugang na babae na nagtutukaw kahampang ko sa ibong na raya naheling akong naghihibi. Nagrani sia, kinugos ako, asin sinabayan ako sa pag-awit kan natatada pang kabtang kan awit. Ako nakamate nin lubos na gayong pagkamoot sa mga tugang na lalaki asin babae asin naogmang marhay na nakaatender kami sa mga pagtiripon, na narerealisar na yaon duman an tabang sa samo, duman sa Kingdom Hall.” Maninigo kitang makipagkatood sa satong mga tugang paagi sa pagtao sa sainda nin karangahan kun iyan kaipuhan asin pagparigon sa boot sa gabos na panahon.—Heb. 10:24, 25.
5 Mantang an daan na kinaban na ini paorog nang paorog na nakapagagabat, magdesidir kita na orog pang midbidon an satong mga tugang. An pagrinibayan na ini nin tunay na pagparigon sa boot magigin bendisyon para sa gabos.—Roma 1:11, 12.