Midbidon na Marhay an Saindong mga Tugang

¹ An satong relasyon sa mga kapwa parasamba kalabot an labi pa sa pag-atender sana sa mga pagtiripon kaiba ninda sa Kingdom Hall. Kita mga paragibo kan kabotan nin Dios, asin dinadara kita kaiyan sa espirituwal na relasyon ki Jesus. (Mar. 3:​34, 35) Dangan, iyan man, dinadara kita sa espirituwal na pampamilyang relasyon sa satong mga tugang sa Kristianong kongregasyon, na pinagbobotan kitang mamotan. (Juan 13:35) Kaya, bilang “mga miembro kan pamilya nin Dios,” maninigo niatong hingoahon na magkaminidbidan na marhay.​—Efe. 2:19.

² Midbidon sa Ngaran an Saindong mga Tugang: Aram daw nindo an ngaran kan gabos sa saindong Pag-adal sa Libro kan Kongregasyon? Sa parate sadit an grupo, na ginigibong pasil na maaraman an ngaran kan kadaklan na nag-aatender. Kun dai ngani nindo aram an saindang ngaran, masasabi daw nindo na midbid na marhay nindo sinda?

³ Kumusta man an pagmidbid sa iba, kabale na an mga aki, na nag-aatender sa mga pagtiripon sa Kingdom Hall? Tibaad may tendensia kitang makiasosyar sa sadit sanang grupo nin mga katood. Mantang bakong sala na mag-ogma sa pakiibaiba sa nagkapira, habo niatong limitaran an mainit na pagtaratara asin pakikipag-olay sa pipira sana. Maninigo kitang ‘humiwas,’ na naghihingoang gayo na mamidbid na marhay an gabos niatong tugang na lalaki asin babae.​—2 Cor. 6:​11-13.

⁴ An mga tugang na nangengenot sa mga pagtiripon maninigong magmaigot na aramon an mga ngaran kan gabos na nag-aatender. An pag-apod gikan sa plataporma sa ngaran kan kada saro nagpapaheling na inaapresyar an saindang mga komento, asin iyan nakakatabang man sa iba na maaraman an saindang ngaran. Siyempre, perming magkakaigwa nin mga bagohan o bisita sa mga nagdadangog, na ginigibong depisil na aramon an kada ngaran. Minsan siring, an padagos na sinserong paghihingoa nakakapakosog sa iba.​—Roma 1:​11, 12.

⁵ Magsadiring Boot na Mamidbid na Marhay: An nagbibiyaheng mga paraataman parateng namimidbid na marhay an sarong dakulang bilang nin mga tugang. Paano ninda ginigibo iyan? Sa tolong paagi: (1) Regular sindang nakikiiba sainda sa paglilingkod sa langtad; (2) nag-aako sinda nin mga imbitasyon na dalawon an mga ini sa saindang harong; asin (3) tinataratara ninda kapwa an mga adulto asin kaakian sa mga pagtiripon.

⁶ Nakakaheling daw kamo nin mga paagi na humiwas asin mas mamidbid na marhay an saindong mga tugang? Puwede niatong imbitaran an iba na ibanan kita sa paglilingkod sa langtad. An pagharongharong, paggibo nin mga pagdalaw liwat, pagduman sa mga pag-adal sa Biblia, o pagpatotoo sa tinampo gabos ekselenteng paagi na makimidbidan. Marahay man na imbitaran an iba sa saindong harong. An pagdolok sa mga bagohan o sa mga masosopgon pareho nakakapakosog.​—Gibo 20:35; 1 Tes. 5:11.

⁷ Midbid na marhay ni Pablo an saiyang mga tugang. An saiyang personal na pagsambit sa saiyang mga surat kan ngaran kan dakol patotoo kan saiyang interes sa sainda asin kan saiyang tunay na pagkamoot sa sainda. (1 Tes. 2:17; 2 Tim. 4:​19, 20) An satong mga paghihingoa na mamidbid na marhay an satong mga tugang mangangahulogan nin mga bendisyon para sa sato gabos.