Ipinapalaen Kita kan Paghuhulit
1 Dakol an naghahapot, “Ano an minagibo sa Mga Saksi ni Jehova na napapalaen sa ibang relihion?” Ano an isisimbag nindo? Puede nindong ipaliwanag an nagkapira sa mga tinutubod niato na basado sa Biblia. Alagad napaghorophorop na man daw nindo na sabihon kun gurano kita ipinapalaen sa ibang relihion kan satong ministeryo sa publiko?—Mat. 24:14; 28:19, 20.
2 Ngonyan, pipirang tawong relihioso an namomotibar na ihiras sa iba an saindang mga paniniwala. Tibaad iniisip ninda na supisyente nang kuyogon an mga ley ni Cesar, mamuhay na disente sa moral, o gumibo nin kabootan sa iba. Minsan siring, dai sinda nakakamate nin obligasyon na tabangan an iba na manodan an sinasabi kan Biblia manongod sa pagkamit nin kaligtasan. Paano kita napapalaen?
3 An satong maigot na ministeryo laen nanggad sa mga aktibidad nin ibang relihion. Sa laog nin labing 100 na taon, an mga Saksi sa presenteng aldaw mahigos na naghulit kan maogmang bareta sagkod sa kaporoporohi kan daga, bilang pag-arog sa enot na mga Kristiano. An satong obheto sa paggibo kaiyan iyo na tabangan an pinakadakol sagkod sa mapupuede na ioyon an saindang buhay sa kabotan nin Dios.—1 Tim. 2:4; 2 Ped. 3:9.
4 Ano an Saindong Reputasyon? Kamo daw midbid na maigot na parahulit kan Tataramon nin Dios? (Gibo 17:2, 3; 18:25) Huli sa saindong paghuhulit, an saindo daw na mga kataed naheheling tolos an pagkakalaen kan saindang relihion asin kan saindo? Kamo daw midbid na saro na gustong-gustong ihiras sa iba an saiyang paglaom? Igwa daw kamo nin regular na kaugalean para sa pakikikabtang sa ministeryo? Girumdomon na ipinapalaen niato an satong sadiri bako sanang paagi sa satong ngaran kundi paagi man sa paggibo niato kan ilinaladawan kan ngaran na iyan—an pagpapatotoo dapit ki Jehova.—Isa. 43:10.
5 An pagkamoot sa Dios asin sa kataed nagmomotibar sa sato na makikabtang sa paghuhulit. (Mat. 22:37-39) Iyan an dahelan kun taano ta kita, siring ki Jesus asin sa mga apostol, boot na aprobetsaran an gabos na oportunidad na ihiras sa iba an mensahe kan Kahadean. Kita logod padagos na maigot na maghulit kan maogmang bareta sa mga andam na maghinanyog. An paggibo kaiyan makatatabang sa mga sadiosan an puso na ‘maheling an kalaenan kan naglilingkod sa Dios asin kan dai naglingkod sa saiya.’—Mal. 3:18.