Manigoan sa Kun Ano an Igwa Kamo
1 Sinasadol kita kan Kasuratan na sustentohan sa materyal an satong kasararo sa harong, alagad dai ini maninigong magin an satong pangenot na pasohan sa buhay. Dapat na maenot an espirituwal na mga bagay. (Mat. 6:33; 1 Tim. 5:8) An pakanompong nin tamang pagkatimbang sarong angat sa “mga panahon [na ini] na masakit pakibagayan.” (2 Tim. 3:1) Ano an makakatabang sa sato na gibohon iyan?
2 Arogon an Punto de Vista kan Biblia: Pinatatanidan kita kan Tataramon nin Dios na an pagmamaigot na makamtan an kayamanan puedeng magin dahelan nin espirituwal na kalaglagan. (Ecl. 5:10; Mat. 13:22; 1 Tim. 6:9, 10) Sa kritikal na panahon na ini, magigin kapahapahamak para sa siisay man sa sato na magin sibot na gayo sa sekular na trabaho o pinansial na mga bagay na huli kaiyan ibinabalyo niato an espirituwal na mga aktibidad—mga pagtiripon, pag-adal, asin paglilingkod—sa segundang lugar sa satong buhay. (Luc. 21:34-36) Sa kabaliktaran, an hatol kan Biblia: “Mantang igwa na nin kakanon asin gubing, maninigoan na kita sa mga bagay na ini.”—1 Tim. 6:7, 8.
3 Dai ini nangangahulogan na an mga Kristiano kaipuhan na mamuhay sa kadukhaan na inimponer sa sadiring boot. Alagad tinatabangan kita kaiyan na aramon kun ano talaga an mga pangangaipo niato sa materyal—kakanon, gubing, asin istaran na supisyente sa kun saen kita nag-iistar. Kun igwa na kita kan mga pangangaipo sa buhay, dai maninigo na kita daing ontok na nagmamaigot na kamtan an mas halangkaw na klase nin pamumuhay. Kun nagpaplanong bumakal o magkaigwa nin dagdag na trabaho, marahay na hapoton ta an satong sadiri, ‘Ini daw talagang kaipuhan?’ An paggibo kaiyan makakatabang sa sato na himateon an ipinasabong na hatol: “An saindo logod na pamumuhay dai apektado nin pagkamoot sa kuarta, mantang kamo naninigoan na sa presenteng mga bagay.”—Heb. 13:5.
4 Kun kita nagtitiwala ki Jehova, bebendisyonan nia kita. (Tal. 3:5, 6) Minsan ngani kaipuhan niato na magmaigot tangani na magkaigwa kan mga pangangaipo sa aroaldaw, dai niato isinesentro an satong buhay sa mga bagay na iyan. Baga man igwa kita nin dikit o dakol, kita nagsasarig ki Jehova na paninigoan an satong mga pangangaipo. (Fil. 4:11-13) Bilang resulta, kita nagkakamit nin diosnon na pagkakontento kaiba an dakol na iba pang bendisyon.
5 Arogon an Pagtubod nin Iba: An sarong nagsosolong magurang na pinadadakula an saiyang aking babae sa dalan nin katotoohan progresibong pinasimple an saiyang buhay. Minsan ngani sia maginhawa sa saiyang harong, sia nagbalyo sa sarong mas sadit na harong asin sa huri sa sarong apartment. Pinapangyari sia kaini na inaan an saiyang oras sa trabaho tanganing makapagdusay sia nin mas dakol na oras sa ministeryo. Kan husto na sa edad asin nag-agom na an saiyang aking babae, nagretiro nin amay an ina, dawa ngani ini nangahulogan nin pag-ina pa sa saiyang entrada. An satong tugang na babae nasa ikapitong taon na ngonyan bilang regular payunir asin dai nagbabasol may labot sa saiyang mga pagsakripisyo kan materyal tangani na enoton nguna an intereses kan Kahadean sa saiyang buhay.
6 An sarong magurang sa kongregasyon asin an saiyang agom nagpayunir nin dakol na taon mientras na nagpapadakula nin tolong aki. Bilang pamilya, nakanood sindang magin kontento sa pagpanigo sa saindang mga pangangaipo imbes na magpadara sa saindang mga gusto. Nagkomento an tugang na lalaki: “Kaipuhan ming mamuhay nin mas simple. Minsan ngani nagkaigwa kami nin nagkapirang depisil na mga panahon, pirmeng itinatao ni Jehova an pangangaipo niamo. . . . Kun naheheling ko an sakong pamilya na ineenot nguna an espirituwal na intereses nin arog kaini, naniniwala ako na an gabos na bagay maninigong magin siring, asin igwa ako nin pakamate na may naginibohan.” Sabi pa kan saiyang agom: “Kun naheheling ko [an sakong agom] na sibot sa espirituwal na mga bagay, nakakamate ako nin mas hararom na pagkakontento.” Naoogma man an mga aki na an saindang mga magurang nagdesisyon na maglingkod ki Jehova nin bilog na panahon.
7 Para sa gabos na nagpipili kan siring na dalan nin diosnon na debosyon imbes na kan pagmamaigot na makamtan an materyal na mga bagay, an Biblia nanunuga nin nagsosopay na mga bendisyon ngonyan sagkod sa buhay na madatong.—1 Tim. 4:8.