Magin Nakapakokosog

¹ Huling kita nabubuhay sa “delikadong mga panahon na masakit pakibagayan,” kita gabos nagkakaipo nin pagparigon sa boot. (2 Tim. 3:1) Dawa kaidtong enot na siglo, sinadol ni apostol Pablo an saiyang mga tugang na “sunodon an mga bagay . . . na nagpapakosog sa lambang saro.” (Roma 14:19) Dinalaw nia liwat an nagkapirang kongregasyon, “na pinapakosog an kalag kan mga disipulo, na pinaririgon an boot ninda na magdanay sa pagtubod.” (Gibo 14:22) Kaipuhan na marhay niato an klaseng iyan nin pagparigon sa boot ngonyan.

² Puede kitang magin nakapakokosog sa iba paagi sa satong sinasabi. Paagi sa pakikikabtang sa mga pagtiripon, kita ‘nagpaparinigonan nin boot.’ An satong dila puedeng gamiton sa positibong paagi kun kita nag-eestorya nin mga eksperyensia, nagtataong komendasyon, o nakikipag-olay manongod sa espirituwal na mga bagay. An siring na paggamit nin dila ‘marahay para sa pagpakosog, na itinatao an paborable sa mga nagdadangog.’​—Efe. 4:29.

³ Ipakipag-olay an Nakapakokosog na mga Bagay: Sa Filipos 4:​8, si Pablo nagsabi na maninigo niatong horophoropon an mga bagay na totoo, seryosong bagay, matanos, malinig, madaling kamotan, marahay an dangog, birtuoso, asin kaomaw-omaw. Pirmeng magigin totoo an satong pakikipag-olay kun basado sa Tataramon nin Dios. (Juan 17:17) An satong Kristianong pagdusay, an nanonodan niato sa mga pagtiripon, asin an satong ministeryo sa langtad, gabos iyan seryosong bagay. An positibong mga pag-orolay manongod sa mga prinsipyo kan Tataramon nin Dios makakatabang sa sato na magin ‘madonong para sa kaligtasan.’​​—2 Tim. 3:15.

⁴ Puede niatong ipahayag an satong pag-apresyar sa mabining gawe-gawe kan mga nasa satong kongregasyon. Puede niatong komendaran an kawiliwiling mga gibo nin kabootan kan satong mga tugang. (Juan 13:​34, 35) Kaiba sa mga bagay na marahay an dangog an marahayon na mga kualidad nin pagtubod, kagayagayahan, katoninongan, asin pakatios na namamasdan niato sa satong mga tugang. An pag-orolay manongod sa siring na birtuoso asin kaomaw-omaw na mga bagay ‘marahay para sa pagpakosog’ sa iba.​—Roma 15:2.

⁵ Aroaldaw napapaatubang kita sa mga kahaditan kan kinaban. Kanigoan kanakagiginhawa na ipagilid an mga ini asin makikabtang sa mamomoton na asosasyon sa satong mga tugang! Kun pirme kitang nakaparirigon sa boot asin nakapakokosog, an iba onestong magsasabi dapit sa sato: “Tinawan ninda nin kaginhawahan an sakong espiritu.”​​—1 Cor. 16:18.