Giyahan an mga Inaadalan sa Biblia Pasiring sa Organisasyon
1 An mga inaadalan sa Biblia kaipuhan na magin pamilyar sa organisasyon ni Jehova. Dapat nindang masabotan na an pagigin kabtang kan organisasyon na iyan kaipuhan sa saindang kaligtasan. (Kap. 7:9, 10, 15) Kun siring, maninigo niatong ponan na giyahan an satong mga inaadalan sa Biblia pasiring sa organisasyon oras na maestablisar an pag-adal sa Biblia.
2 Tabangan an saindong mga inaadalan sa Biblia na magin pamilyar sa dakol na kabtang kan organisasyon ni Jehova, na ipinaheheling sa sainda na sinusunod kaiyan an arogan kan enot na siglong mga Kristiano. Paano ini magigibo?
3 Gamiton an Brosyur na Jehovah’s Witnesses: An brosyur na may temang Jehovah’s Witnesses—Who Are They? What Do They Believe? igwa nin kompletong impormasyon mapadapit sa organisasyon ni Jehova asin sa saiyang mga Saksi. Digdi sa Pilipinas iyan makukua sa limang lenguahe saka sa Ingles. Naggagamit daw kamo nin pirang minuto kada semana sa paggamit kan brosyur na ini tangani na mapatalubo an pag-apresyar kan saindong inaadalan para sa organisasyon? Tinawan na daw nindo nin kopya an saindong inaadalan sa Biblia? Nagdadara daw kamo nin kopya kun kamo minaduman sa saindong inaadalan sa Biblia?
4 Tinotokar kan pahina 6 sagkod 11 kan brosyur an kasaysayan asin pag-oswag kan banwaan nin Dios sa presenteng mga panahon. Itinatao kan pahina 12 asin 13 an halipot na sumaryo kan satong mga tinutubod. Ipinaheheling kan pahina 25 asin 26 an pambilog na kinaban na sakop kan organisasyon, mantang tinotokar kan pahina 27 sagkod 30 an parateng mga ihinahapot nin interesadong mga tawo.
5 Mayo na nin mas marahay na paagi na magin pamilyar sa organisasyon an saindong inaadalan kisa pag-imbitar sa saiya na umatender sa mga pagtiripon. Bago gibohon iyan, tibaad boot nindong repasohon sa saiya an enot na hapot na nasa pahina 30 kan brosyur. O, kun madalaw sa semanang iyan an paraataman sa sirkito, tibaad boot nindong repasohon an enot na parapo sa irarom kan subtemang “Their Worldwide Organization and Work” na nasa pahina 25. Kun iimbitaran nindo sa kombension o asamblea, o na dumalaw sa Bethel an saindong inaadalan, makakatabang para sa saindo an impormasyon sa pahina 10 asin 11 na mapatalubo an pag-antisipar sa mga ini.
6 Paagi sa paggamit nin espesipikong mga punto hale sa brosyur na Jehovah’s Witnesses kun may lumataw na oportunidad asin mga pangangaipo, matatabangan nindo an inaadalan na apresyaron an organisasyon asin magustong makiasosyar dian. Mantang ginigibo nindo ini, seguradohon na kamo, an “nagtotokdo sa iba,” nagtatao nin marahay na halimbawa sa pagpaheling nin pag-apresyar sa organisasyon ni Jehova. (Roma 2:21) Sa paggibo kaiyan, puede nindong matabangan an iba na umayon sa “sarong aripompon” na pinangengenotan ni Jesus pasiring sa buhay na daing katapusan.—Juan 10:16.