Mga Paisi
◼ Alok sa Enero: Puedeng ialok an arin man sa haloy nang libro na 192 pahinas. An mga mayo nin haloy nang mga libro puedeng ialok an Mankind’s Search for God. Pebrero: Puedeng ialok magsalang an librong Creation o an librong Revelation Climax. Marso: Iaalok an librong Kaaraman na may paghihingoang makapoon nin mga pag-adal sa Biblia. Abril asin Mayo: Indibiduwal na mga kopya kan An Torrengbantayan asin Awake! Sa mga dinadalaw liwat, an mga parahayag puedeng mag-alok na ihatod an mga magasin nin regular, na may pasohan na makapoon nin pag-adal sa Biblia.
◼ Maninigong gumibo nin mga areglo an mga kongregasyon sa pagselebrar kan Memorial ngonyan na taon sa Mierkoles, Abril 16, 2003, pagkasolnop kan saldang. Minsan ngani an pahayag puedeng magpoon nin mas amay, an pagpasa kan mga emblema kan Memorial maninigong dai magpoon sagkod na dai pa nakasolnop an saldang. Dawa ngani mamawoton kan kada kongregasyon na magkaigwa nin sadiri kaiyan na selebrasyon kan Memorial, tibaad ini bako pirmeng posible. Sa mga lugar na nagkapirang kongregasyon an dati nang naggagamit nin sasarong Kingdom Hall, tibaad an saro o labi pang kongregasyon puedeng kumua nin ibang pasilidad na magagamit para sa bangging iyan.
◼ An espesyal na pampublikong pahayag para sa panahon kan Memorial sa 2003 itatao sa Domingo, Abril 27, 2003. May itataong outline para sa mga ispiker sa tamang panahon. An mga kongregasyon na dinadalaw kan paraataman sa sirkito, may pansirkitong asamblea, o espesyal na aldaw nin asamblea sa katapusan kan semanang iyan magkakaigwa kan espesyal na pahayag sa masunod na semana. Mayong kongregasyon na maninigong magkaigwa nin espesyal na pahayag bago Abril 27, 2003.
◼ Mantang an Abril asin Mayo espesyal na mga bulan nin pagmamagasin asin dakol an makikikabtang sa pag-auxiliary payunir sa panahon na iyan, an paraataman sa paglilingkod asin an tugang na nag-aasikaso kan mga magasin maninigong planohon na ngonyan an pagpedido nin dugang na mga magasin na gagamiton kan kongregasyon durante kan mga bulan na iyan. Ipadara tabi an saindong espesyal na mga pedido tangani na umabot iyan sa sangang opisina sa Pebrero 1, 2003. Seseguradohon kaini na mareresibi nindo an dugang na mga magasin kadungan kan saindong regular na pedido.
◼ Makukuang Bagong Publikasyon:
Watch Tower Publications Index—2001—Ingles